Hadisə

Ana səhifə

Hadisə

Zakir Nəsirov: “Hacı Məmmədovun havadarlarını Baş Prokurorluqda axtarmaq lazımdır”

14 dekabr 2006 16:53 (UTC +04:00)

APA-nın məlumatına görə, prosesdə təqsirləndirilən Hacı Məmmədov son sözünü davam etdirib. O, “Azərsığorta” Dövlət Şirkətinin rəhbəri Məmməd Məmmədovun oğlu Əhməd Məmmədovun oğurlanmasından başqa bütün işlərdən peşman olduğunu bildirib: “Səhvim o olub ki, Məmmədi oğurlamamışam. Milli Təhlükəsizlik Nazirliyindən qaça bilsəm, onu oğurlayacağam. İmkanım olsaydı, 3-4 mətbuat işçisinin və 4-5 vəkilin dilini kəsərdim. Adil İsmayılovu nəzərdə tutmuram. Belə radikal hərəkətlərim məni bura gətirib”. Sonda Hacı Məmmədov törətdiyi cinayətlərə görə Azərbaycan xalqından üzr istəyib və bu yola düşməyinin səbəbini AXCP hakimiyyətinin səbatsız fəaliyyəti ilə əsaslandırıb: “Uzun müddət polisə şərəflə xidmət etmişəm. Azərbaycan Xalq Cəbhəsi hakimiyyətə gəldikdən sonra İsgəndər Həmidovun qərarı ilə işdən çıxarılmışam. Bununla da gələcək bandanın yetişməsinin əsasını qoyublar. İsgəndər Həmidov mənə müsahibələrində qorxaq deyib, ancaq məni bu günə o dövr salıb. İşdən çıxarıldıqdan sonra Şirxan Albiyevə qoşulub cinayətlərə başlamışam. Hərəkətlərimə görə Azərbaycan polisindən üzr istəyirəm. Heç vaxt polis adından istifadə etməmişəm. Yaxın dostlarımdan üzr istəyirəm, mənə görə, onları da biabır ediblər. Kriminalist Rövşən Əliyev dostum olub, onun qətlinin öz tarixçəsi və sifarişçisi var. Rövşənin qətlinin mənim cinayət işlərimlə əlaqəsi olmayıb”. Prosesdə təqsirləndirilənlər Nailə Quliyeva, Musa Dabuyev, Aslanbek Çintamirov, Əliquli Quliyev, Malik Məmmədov, Nizami Abdullayev, Sidek Abdulvahabov, Fərhad Məmmədbəyov, Eldar Rəhimov, Yagir Məmmədov və Rövşən Ağayev son söz deyib və məhkəmədən ədalətli qərar verməsini xahiş ediblər. Sonra DİN Baş Cinayət-Axtarış İdarəsinin sabiq rəisi Zakir Nəsirov son söz deyib və çirkin oyunun qurbanı olduğunu bildirib: “Polisdə şərəflə xidmət etmişəm. Razılaşıram ki, bəzi nöqsanlarım olub, çünki idarəmdə Hacı kimi adam işləyib və onun cinayət əməllərini görməmişəm. Mənin adıma yazılan cinayətləri törətməmişəm. Hacı və dövlət ittihamçılarının dedikləri mənə yaraşmır. Çirkin oyunun qurbanı olmuşam. Çirkin adamlar Hacıdan istifadə edərək bu oyunu başıma gətiriblər. Həbsim Hacının mənə qarşı verdiyi ifadələrlə əlaqədardır. Əmin edirəm ki, məni heç bir müqavimət göstərmədən qurbanlıq olacağımı düşünənlər səhv edirlər, onların istəkləri Allahın köməkliyi ilə ürəklərində qalacaq. Hacı yalan danışır, onun mənim haqda dedikləri cəfəngiyatdır. Rövşən Əliyevi öldürməsinə görə tost deyib, sonra ona yas saxlayan adamın mənə qarşı ifadə verməsi başa düşüləndir”. Z. Nəsirov H. Məmmədovun əsas məqsədinin bacısı oğlu Elçin Əliyevi xilas etmək olduğunu deyib: “Hacının qarşısına qoyduğu məqsəd Elçini xilas etmək idi. O, bunun üçün bütün oyunlara getdi və məni də bu işə qatı. Bu prokurorluğa da sərf edirdi. Mən və digər şəxslərə ömürlük cəza, Elçinə isə 10 il cəza istənilməsi Hacı ilə bazarlığın nəticəsidir. Əgər belədirsə, Azər İsmayılovu aldadaraq Hacının yanına gətirən Əliqulu Quliyevə niyə cəmi 12 il iş istənilir?” Məhkəmənin obyektiv qərar çıxaracağına inanmadığını deyən Z. Nəsirov bunu məhkəmə istintaqda ona qarşı ifadə verən gön-dəri zavodunun rəhbəri Yaluxan İluyev, Məcid Məmmədovun oğlanları Mübariz və Hafiz Məmmədovların və Məmməd Məmmədovun məhkəməyə gəlməsi ilə bağlı qaldırılan vəsatətlərin təmin olunmamağı ilə əlaqələndirib. Zakir Nəsirov Hacı Məmmədovun havadarlarını Baş Prokurorluqda axtarmağın vacibliyini vurğulayıb: “Rövşən Əliyevin qətli ilə bağlı Hacı istintaqa çağırılıb və ifadə verəndən sonra protokola imza atmadan Zamirəni oğurlamağa gedib. Azər İsmayılovun istintaqı zamanı müstəntiq Nailə Quliyevanın evinə kimi gedib çıxmışdı, ancaq işi axıra kimi aparmayıb. Rövşən qətlə yetirilən gün Zakir Qaralov onunla 369 saniyə mobil telefonla danışıb. Bu danışığın özü də bəzi məqamlardan xəbər verir. Hacının havadarlarını prokurorluqda axtarmaq lazımdır. Rəna Nəsibovanın Rüstəm Usubova dedikləri araşdırılsaydı, nə Fətulla Hüseynov, nə də Rəna Nəsibova ölərdi. Zamirə də oğurlanmazdı. Bu işlərin günahı da prokurorluğun boynundadır”. Z. Nəsirov Bakı Şəhər Baş Polis İdarəsinin əməkdaşları və rəisi Məhərrəm Əliyevlə münasibətlərinin tarixçəsinə aydınlıq gətirib: “1995-ci ildə Heydər Əliyevin təyyarəsini vurmaq istəyən dəstə Daxili İşlər Nazirliyinin əməkdaşları tərəfindən alındı. Sonradan məlum oldu ki, bu dəstənin üzvləri bir neçə gün əvvəl Bakı Şəhər Baş Polis İdarəsində saxlanılıb, külli-miqdarda pul aldıqdan sonra onları azadlığa buraxıblar. Məhərrəm Əliyev bu dəqiqə də raket məsələsini mənə bağışlamır. Cavadağa Sultanovun mənim barəmdə danışdıqları aramızda olan şəxsi münasibətlə bağlıdır”. Proses dekabrın 15-də təqsirləndirilən şəxslərin son söz deməsi ilə davam etdiriləcək. /APA/