Hadisə

Ana səhifə

Hadisə

BQXK əməkdaşları erməni əsirliyində olan Azərbaycan əsgəri Samir Məmmədova beşinci dəfə baş çəkərək, ailəsinin məktubunu ona çatdırıblar

11 yanvar 2007 09:29 (UTC +04:00)

Bu barədə APA-ya BQXK-nın Azərbaycan nümayəndəliyinin ictimaiyyətlə əlaqələr şöbəsinin əməkdaşı Gülnaz Quliyeva məlumat verib. Bu, komitə əməkdaşlarının azərbaycanlı əsirlə beşinci görüşüdür. Qurumun əməkdaşları ailəsinin əsirə yazdığı növbəti məktubu ona çatdırıblar. Ermənilərin dekabrın 31-də əsir götürdüyü və hazırda Azərbaycanın işğal olunmuş ərazisində saxlanılan Azərbaycan hərbçisi Eldəniz Nuriyevin ailəsinə yazdığı ilk məktub da ünvanına çatdırılıb. BQXK-nin Dağlıq Qarabağdakı ofisinin əməkdaşları əsirlə srağagün görüşüblər.
Qeyd edək ki, Qazaxdakı “N” saylı hərbi hissədə xidmət edən kiçik çavuş S.Məmmədov hərbi xidmətə 1 il əvvəl Bərdə Hərbi Komissarlığından çağırılıb. O, dekabrın 24-də xidmət etdiyi hərbi hissədən 15 km aralıda, neytral zonada Qazax-İcevan sərhədində əsir götürülüb. Azərbaycanlı hərbçinin üzərində silah-sursat olmayıb. 1976-cı il təvəllüdlü E.Nuriyev isə 2005-ci ilin iyulunda Ağsu rayon Hərbi Komissarlığından hərbi xidmətə çağırılıb. O, cəbhənin cənub istiqamətində, Füzuli rayonu ərazisində 2006-cı il dekabrın 31-də əsir götürülüb. Azərbaycan Müdafiə Nazirliyi hərbçinin azaraq əsir düşdüyünü açıqlayıb. /APA/