Hadisə

Ana səhifə

Hadisə

Qarabağ müharibəsi iştirakçısının ölümündə təqsirli bilinən polis əməkdaşları barəsindəki cinayət işinə Ağır Cinayətlərə Dair İşlər üzrə Məhkəmədə baxılacaq

11 yanvar 2007 09:35 (UTC +04:00)

Qarabağ müharibəsi iştirakçısı Rasim Əlişovun ölümündə təqsirli bilinən Mingəçevir şəhər Polis İdarəsinin 4 əməkdaşı barəsindəki cinayət işi baxılmaq üçün Ağır Cinayətlərə Dair İşlər üzrə Məhkəmənin hakimi Nüşabə Ağayevanın icraatına verilib. Bu barədə APA-ya məhkəmədən məlumat daxil olub. Cinayət işinin materialları hakimin icraatına yeni verildiyindən iş üzrə hazırlıq iclasının vaxtı hələlik müəyyənləşdirilməyib.
Xatırladaq ki, R. Əlişovun 2006-cı il iyulun 25-də Mingəçevir Polis İdarəsinin binasında döyülərək öldürülməsindən sonra daxili işlər nazirinin əmri ilə idarədə xidməti təhqiqat aparılıb. Təhqiqat qrupunun rəyindən sonra nazir Ramil Usubovun əmri ilə idarənin cinayət-axtarış bölməsinin rəisi İlqar Abbasov və bölmənin əməliyyat müvəkkili Elçin Musayev vəzifələrindən azad olunublar, 3 nəfər polis əməkdaşına isə töhmət verilib. İlqar Abbasov daxili işlər orqanlarından xaric edilib və ona, həmçinin Elçin Musayevə, polis nəfərləri Ramiz Murquzova, Anar Həsənova Cinayət Məcəlləsinin 309-cu (vəzifə səlahiyyətlərini aşma) maddəsi ilə ittiham elan olunub. /APA/