Hadisə

Ana səhifə

Hadisə

Penitensiar Xidmətin sabiq əməkdaşlarının məhkəməsi davam edir

11 yanvar 2007 15:30 (UTC +04:00)

Ağır Cinayətlərə Dair İşlər üzrə Məhkəmədə hakim Eynulla Vəliyevin sədrliyi ilə Ədliyyə Nazirliyinin Məhkəmə Qərarlarının İcrası Baş İdarəsinin (indiki Penitensiar Xidmət) sabiq rəis müavini Gülməmməd Məmmədov, İntendant-Təchizat və Ticarət Bazasının sabiq rəisi Cavanşir Cabbarov və bu sistemin digər sabiq əməkdaşlarının məhkəmə prosesi davam etdirilib. APA-nın məlumatına görə, prosesdə C. Cabbarovun vəkili Əli Mehdiyev vəsatət verərək məhkəmə istintaqının yenidən aparılmasını xahiş edib. O, vəsatətini məhkəmə istintaqının düzgün aparılmaması və dindirilməyən şahidlərin olması ilə əsaslandırıb. Ancaq vəsatət təmin olunmayıb. Proses yanvarın 12-də təqsirləndirilən şəxslərin son söz deməsi ilə davam etdiriləcək.
Qeyd edək ki, hakim qarşısında Penitensiar Xidmətin keçmiş əməkdaşları ilə bərabər cəzaçəkmə müəssisələrinə ərzaq və digər mal verən firmaların rəhbərləri ümumilikdə 24 nəfər təqsirləndirilən şəxs dayanıb. Həmin şəxslər cəzaçəkmə müəssisələrinə ayrılmış ərzaq, dərman və digər malları mənimsəməkdə ittiham olunurlar. İttiham aktına əsasən dəstə üzvləri 5 il ərzində 16 milyard köhnə manat məbləğində dövlət əmlakını mənimsəyiblər. Təqsirləndirilənlərə Cinayət Məcəlləsinin 179.3.1-ci (mənimsəmə və ya israf etmə), 308.2-ci (vəzifə səlahiyyətlərindən sui-istifadə), 309-cu (vəzifə səlahiyyətlərini aşma), 313-cü (vəzifə saxtakarlığı), 320-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, hazırlama, satma və ya saxta sənədlərdən istifadə etmə) maddələri ilə ittiham elan olunub. /APA/