Hadisə

Ana səhifə

Hadisə

Cənub bölgəsində sərnişindaşıma ilə məşğul olan qurumlar qiymətləri süni şəkildə qaldırırlar

02 fevral 2007 10:51 (UTC +04:00)

Sərnişindaşıma xidməti üçün Tarif Şurasının müəyyənləşdirdiyi qaydalara Lənkəranda və qonşu rayonlarda əməl olunmur. Bu barədə APA-nın cənub bürosuna Lənkəranın ayrı-ayrı yaşayış məntəqələrindən məlumat verilib. Belə ki, Tarif Şurasının qərarı ilə enerjidaşıyıcılarının qiyməti qaldırıldıqdan sonra şəhərdaxili və şəhərətrafı marşrutlarda gediş haqqı xeyli artırılıb. Əvvəllər şəhərdaxili marşrutda sərnişinlərdən 10 qəpik alınırdısa, indi məcburən 20 qəpik tələb olunur.
Şəhərətrafı marşrutlarda vəziyyət daha acınacaqlıdır. Tarif Şurasının müəyyənləşdirdiyi kimi, 1-25 kilometrlik məsafə üçün 25 qəpik gediş haqqı alınmalı olduğu halda, sürücülər bu məsafəni qət etmiş sərnişinlərdən 40-50 qəpik alırlar. Lənkəran-Astara və Lənkəran-Masallı marşrutlarında da gediş haqqı 60 qəpikdən 1 manata qaldırılıb. Halbuki hər iki rayon arasındakı məsafə 50 kilometrdən də azdır. Lənkəranın Mərkəzi Şəhər Poçtamtında işləyən Xarxatan kənd sakini Şakir Babayevin sözlərinə görə, əvvəllər gündəlik gediş-gəliş üçün 50 qəpik ödəməli olurdusa, indi bu rəqəm 80 qəpiyə qalxıb. Belə çıxır ki, qazancımın çoxunu elə yollarda xərcləməliyəm”.
Sərnişindaşımada gediş haqqının bu qədər şişirdilməsi Lənkəran Dövlət Universitetində, humanitar kollecdə və tibb məktəbində təhsil alan kənd uşaqlarının da maddi durumuna kəskin təsir edib. Mövcud vəziyyətlə bağlı APA-nın cənub bürosunun sorğusunu cavablandıran “Lənkəran-Sərnişin“ Səhmdar Cəmiyyətinin sədri İlqar İbrahimov deyib ki, Tarif Şurasının qərarı onlara aid deyil: “Səhmdar cəmiyyət sərnişindaşıma qiymətlərini öz sərbəst tənzimləyir”. /APA/