Hadisə

Ana səhifə

Hadisə

“Çağırışa möhlət verilməsini nəzərdə tutan qanun müddəalarının sayı azaldılmalıdır” mövzusunda debat keçirilib

02 fevral 2007 14:05 (UTC +04:00)

“Ehtiyatda və İstefada Olan Zabitlər” İctimai Birliyi “Ordu quruculuğu mövzularında debatların təşkili” layihəsi çərçivəsində “Çağırışa möhlət verilməsini nəzərdə tutan qanun müddəalarının sayı azaldılmalıdır” mövzusunda debat keçirib. APA-nın məlumatına görə, birliyin sədri Yaşar Cəfərli qanunda çağırışçılara möhlət hüququ verən müddəaların aradan qaldırılmasının zəruriliyini vurğulayıb. Onun sözlərinə görə, müharibə vəziyyətində olan ölkədə çağırışçılar üçün möhlət hüququnun olması anlaşılan deyil. Debatda digər tərəfin opponenti kimi çıxış edən hərbi ekspert İldırım Məmmədov deyilənlərlə razılaşmadığını və silahlı qüvvələr quruculuğunda problemin olduğunu deyib: “Çağırışçıların say-seçmələri digər qoşun növlərinə aparılır. Müdafiə Nazirliyinin tabeçiliyində olan hərbi birləşmələrə isə zəif və cılız çağırışçılar toplanır”. Silahlı Qüvvələrə Demokratik Vətəndaş Nəzarəti Azərbaycan Mərkəzinin direktoru Ələkbər Məmmədov da çağırışa möhlət verilməsini nəzərdə tutan qanun müddəalarının qalmasının tərəfdarı olduğunu söyləyib: “Amma bunun məmurlar üçün gəlir mənbəyinə çevrilməsinin qarşısı alınmalıdır”. /APA/