Hadisə

Ana səhifə

Hadisə

Qarabağ əlilini döyərək öldürməkdə ittiham olunan polis əməkdaşlarının məhkəməsi davam edir

05 fevral 2007 16:01 (UTC +04:00)

Ağır Cinayətlərə Dair İşlər üzrə Məhkəmədə hakim Nüşabə Ağayevanın sədrliyi ilə Qarabağ müharibəsi iştirakçısı Rasim Əlişovun ölümündə təqsirli bilinən Mingəçevir şəhər Polis İdarəsinin 4 sabiq əməkdaşı barəsindəki cinayət işi üzrə məhkəmə prosesi davam etdirilib. APA-nın məlumatına görə, prosesdə şahidlər ifadə veriblər. Şahid qismində ifadə verən Mingəçevir şəhər Polis İdarəsinin Cinayət-axtarış bölməsinin əməliyyat müvəkkili Əli Heydərov R. Əlişova işgəncə verilməsindən xəbəri olmadığını və onun öldüyünü idarənin növbətçisindən eşitdiyini bildirib. R. Əlişovun ölümü haqda ona geniş məlumat verilmədiyini deyən Ə. Heydərov otağında bir ədəd qandal və qırılmış polis dəyənəyi olduğunu deyib: “Həmin “dubunka”nı yararsız zənn edib Kür çayına atmışam. Bir neçə gündən sonra bildim ki, bu “dubinka” Rasimi döyərkən sınıb. Ona görə də, bu barədə sonradan istintaqda yenidən ifadə vermişəm”.
Mingəçevir Polis İdarəsi Cinayət-axtarış bölməsinin rəisi İlqar Abbasov isə Ə. Heydərovun dediklərini təkzib edərək R. Əlişovu onunla birlikdə döydüyünü söyləyib. Bundan sonra prosesdə digər şahidlər ifadə veriblər. Məhkəmə prosesi fevralın 12-də davam etdiriləcək.
Xatırladaq ki, Mingəçevir şəhərinin Tərəvəzçilik sovxozu ərazisində yaşayan Qarabağ əlili R. Əlişov ötən il iyulun 24-də qaramal oğurluğu ilə əlaqədar şəhər Polis İdarəsinin inzibati binasına gətirilib. Burada cinayəti tam etiraf etmədiyinə görə R. Əlişovu xüsusi amansızlıqla döyüblər və o, idarənin Cinayət-axtarış bölməsinin rəisi İlqar Abbasovun xidməti otağında ölüb. İşlə bağlı Cinayət-axtarış bölməsinin əməliyyat müvəkkili Elçin Musayev, polis nəfərləri Ramiz Murquzov və Anar Həsənov da ittiham olunurlar. /APA/