Hadisə

Ana səhifə

Hadisə

Azərbaycanın Dəvəçi rayon Polis Şöbəsi Məcidova bacılarını qətlə yetirməkdə təqsirləndirilən Təvəkkül İsmayılov barəsində cinayət işi başlanmasını iki dəfə rədd edib

31 avqust 2007 10:36 (UTC +04:00)

Dəvəçi rayonunun Dağ Bilici kənd sakini Bədəl Daşdıyev 17 may 2005-ci ildə itkin düşmüş qızı Diləfruz Daşdıyevanın indiyədək tapılmamasında hüquq-mühafizə orqanlarını ittiham edib. O, APA-nın şimal bürosuna açıqlamasında bildirib ki, Qələgah kənd sakini Təvəkkül İsmayılov tərəfindən aldadılaraq qaçırılan qızı Diləfruzla bağlı dəfələrlə Dəvəçi Rayon Polis Şöbəsinin və rayon prokurorluğunun rəhbərliyinə etdiyi müraciətlər heç bir nəticə verməyib. B. Daşdıyev buna sübut kimi APA-ya bir neçə rəsmi sənəd təqdim edib. Həmin sənədlər sırasında B. Daşdıyevin Dəvəçinin hüquq-mühafizə orqanlarına və müxtəlif dövlət instansiyalarına ünvanladığı müraciətlərin göndərilməsi və alınması barədə poçt qəbzləri, rəsmilərin yazışmaları və cavabları var. Sənədlərin araşdırılması zamanı aydın olur ki, hadisədən dərhal sonra B. Daşdıyev qızı Diləfruzun məhz T. İsmayılov tərəfindən qaçırılmasından xəbər tutub və yerli polisi bu barədə məlumatlandırıb.
Dəvəçi rayon hüquq-mühafizə orqanları rəhbərlərinin bununla bağlı yazışmalarını isə heç bir şərh vermədən diqqətə çatdırırıq: Dəvəçi rayonunun sabiq prokuroru, ədliyyə müşaviri Sabir Əliyev 3 fevral 2006-cı il tarixdə polis rəisi Nizami Sadıqova göndərdiyi 06C-06 nömrəli məktubda yazır: ”Vətəndaş Daşdıyeva Hürü Şirəli qızının (Bədəl Daşdıyevin həyat yoldaşı red.) şikayəti əsasında toplanmış material üzrə cinayət işi başlanmasının rədd edilməsi haqqında 11.06.2005-ci il tarixli qərar əsassız olduğundan, tərəfimdən 03.02.2006 tarixli qərarla ləğv edilərək, material əlavə yoxlama aparılması üçün Sizə qaytarılır. Həmçinin vətəndaş Daşdıyev Bədəl Süleyman oğlunun Azərbaycan Respublikasının Baş Prokurorluğundan daxil olmuş ərizə və ərizə ilə əlaqədar toplanmış sənədlər həmin materiala əlavə edilib, tam, hərtərəfli və obyektiv yoxlanması üçün aidiyyəti üzrə Sizə göndərilir. Araşdırmanın nəticəsi barədə şikayətçiyə bildirməyinizi xahiş edirəm”.
Azərbaycan Respublikası Baş Prokurorluğunun daxili işlər orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəis müavini, baş ədliyyə müşaviri Məmməd Cabbarov 01.03.2007 tarixdə Bədəl Daşdıyevə 05/32 nömrəli cavab məktubunda bildirir: “Sizin Azərbaycan Respublikası Prezidentinin İcra Aparatından daxil olmuş ərizəniz baxılıb müvafiq tədbir görülməsi üçün Dəvəçi rayon prokurorluğuna göndərilmişdir. Nəticəsi barədə Dəvəçi rayon prokurorluğu tərəfindən Sizə cavab veriləcəkdir”.
Dəvəçi rayon prokuroru Sabir Əliyevin 15.05.2007 il tarixdə Bədəl Daşdıyevə göndərdiyi 22Ş-07 nömrəli cavab məktubunda isə deyilir: “Qızınız Diləfruz Daşdıyevanın Qələgah kənd sakini İsmayılov Təvəkkül Bayram oğlu tərəfindən 17.05.2005 tarixdə evlənmək adı ilə aldadılıb aparılması və həmin vaxtdan indiyədək itkin düşməsi haqqında rayon polis şöbəsinə etdiyiniz müraciətlərinizə baxılmaması barədə Azərbaycan Respublikasının Baş Prokurorluğundan daxil olmuş ərizənizə rayon prokurorluğunda baxılmışdır. Bununla əlaqədar rayon polis şöbəsinin təhqiqat qrupunda toplanmış material tələb edilib öyrənildi və aparılmış araşdırmanın nəticəsinə dair qəbul edilmiş cinayət işi başlanmasının rədd edilməsi haqqında qərar ləğv edilərək, material ərizənizlə birlikdə əlavə yoxlama aparılması üçün RPŞ-yə göndərilmişdir”.
Dəvəçi rayon prokuroru Sabir Əliyevin 5 may 2007-ci il tarixdə Hürü Daşdıyevaya ünvanladığı və Dəvəçi RPŞ-nin təhqiqat qrupunda toplanmış materiallar əsasında gəldiyi qərar isə hər şeyə aydınlıq gətirir: “Dəvəçi rayonun Dağ Bilici kənd sakini Daşdıyev Bədəl Süleyman oğlu rayon prokurorluğuna Azərbaycan Respublikasının Baş Prokurorluğundan daxil olmuş ərizəsində 17 may 2005-ci il tarixdə qızı Diləfruz Daşdıyevanın rayonunun Qələgah kənd sakini İsmayılov Təvəkkül Bayram oğlu tərəfindən evlənmək adı ilə aldadılıb aparılması və həmin vaxtdan indiyədək itkin düşməsi haqqında rayon polis şöbəsinə etdiyi müraciətlərinə baxılmaması, qızının axtarışı ilə bağlı tədbirlər görülməməsi barədə şikayət etmişdir. Bununla əlaqədar B.S.Daşdıyevin həyat yoldaşı Daşdıyeva Hürü Şirəli qızının həmin məsələ barədə rayon polis şöbəsinə etdiyi 01.06.2005 il tarixli şikayəti əsasında RPŞ-nin təhqiqat qrupunda toplanmış HK-1/162 saylı material tərəfimdən tələb edilib öyrənilmişdir. Müəyyən edilmişdir ki, H.Ş.Daşdıyevanın şikayəti ilə əlaqədar RPŞ-nin təhqiqat qrupunun təhqiqatçısı Coşqun Mütəllimov tərəfindən araşdırma aparılmış və 11.06.2005 il tarixli qərarla Azərbaycan Respublikası CM-nin 39.1.2 maddəsinə əsasən cinayət işinin başlanması rədd edilmişdir. Həmin qərar əsassız olduğundan tərəfimdən 03.02.2006 il tarixdə ləğv edilərək, material bir sıra göstərişlərlə əlavə yoxlamaya qaytarılmışdır. Material üzrə əlavə yoxlama aparılıb, 02.03.2006 il tarixdə təkrarən eyni əsasla cinayət işi başlanmasının rədd edilməsi haqqında qərar qəbul edilmişdir. Material öyrənilərkən müəyyən edildi ki, araşdırma səthi və natamam aparılmış, əhəmiyyət kəsb edən halların hərtərəfli araşdırılması təmin olunmamış, rayon prokurorluğu tərəfindən verilmiş göstərişlər tam şəkildə icra edilməmişdir. Toplanmış materiallardan görünür ki, Diləfruz Daşdıyeva Təvəkkül İsmayılovla ailə qurmaq məqsədilə öz evlərindən könüllü olaraq ona qoşulub getmişdir. Lakin araşdırma zamanı İsmayılov Təvəkkül Bayram oğlu müəyyən edilib həmin xüsusatla bağlı izahatı alınmamış və D. Daşdıyevanın həqiqətən də onunla gedib-getməməsi dəqiqləşdirilməmişdir. Ona görə də təhqiqatçının cinayət işi başlanmasının rədd edilməsi haqqında 02.03.2006 il tarixli qərarı əsassız olduğundan, ləğv edilərək material əlavə yoxlamaya qaytarılmalıdır. Əlavə yoxlama zamanı B.Daşdıyevin şikayətində göstərilən xüsusatların tam, hərtərəfli və obyektiv araşdırılması, barəsində şikayət edilən İsmayılov Təvəkkül Bayram oğlunun, həmçinin onun yaxın qohumlarının müəyyən olunub izahatlarının alınması, D.Daşdiyevanın olduğu yerin müəyyən edilməsi üçün zəruri tədbirlər görülməsi, meydana çıxan digər əhəmiyyət kəsb edən halların ətraflı yoxlanılması və araşdırmanın nəticəsindən asılı olaraq qanuni qərar qəbul olunması təmin edilməlidir”.
Bədəl Daşdıyev APA-nın şimal bürosuna açıqlamasında Təvəkkül İsmayılovu himayə edənlərin adlarını çəkib və bu cinayət işinin açılmamasında maraqlı olmalarını açıqlayıb. Lakin B. Daşdiyevin avqustun 6-da Dağ Bilici kənd sakinləri, 14 yaşlı Nailə və 8 yaşlı Reyhanə Məcidova bacılarını öldürərək Samur-Abşeron su kanalına atan Təvəkkül İsmayılovun cinayət işini araşdıran Respublika Prokurorluğunun Ağır Cinayətlərə Dair İşlər üzrə İstintaq İdarəsinin müstəntiqi tərəfindən bir neçə saat dindirildiyini nəzərə alaraq, onun söylədiklərinin yayılması məqsədəuyğun deyil.
Qeyd edək ki, Dəvəçi rayonunun Qələgah kənd sakini Təvəkkül İsmayılov 2005-ci il mayın 17-də Diləfruz Daşdıyevanı qaçırıb. Bir müddət sonra qız yoxa çıxıb. Qızın ailəsinin onun harada olması ilə bağlı sorğusuna Təvəkkül İsmayılov cavab verməyib. O, qızın qaçıb getdiyini, yerini bilmədiyini deyib. Diləfruzun atası Bədəl Daşdıyev isə buna inanmayaraq, hüquq-mühafizə orqanlarına müraciət etsə də, heç bir araşdırma aparılmayıb. Hadisədən bir az sonra isə rayonun Ləcə kənd sakini Rahim Hidayətov yaxınlıqdakı meşədən Diləfruzun paltarlarını tapıb, ailəsinə təqdim edir. Bundan az sonra isə Rahim Hidayətov yoxa çıxır. Onun meyiti yalnız bu il avqustun 12-də T. İsmayılovun qətlə yetirdiyi Nailə və Reyhanə Məcidova bacılarının meyiti ilə bağlı axtarışlar zamanı Siyəzən rayonu ərazisindəki qamışlıqdan tapılıb. /APA/