Hadisə

Ana səhifə

Hadisə

Azərbaycan baş nazirinin müavini: “Uçmuş binada betonun markası layihədə göstəriləndən 3 dəfə aşağı olub”

31 avqust 2007 17:01 (UTC +04:00)

Onun sözlərinə görə, iclasda bundan sonra hadisə yerində görüləcək işlər müzakirə olunub. A. Şərifov aparılan axtarış-xilasetmə işləri ilə bağlı səslənən tənqidləri qəbul etməyib: “Ünvanımıza ən çox səslənən ittiham bundan ibarətdir ki, axtarış-xilasetmə işləri ləng aparılır. Bu adamlar başa düşmürlər ki, uçqunlar altında insanlar var. Onlardan sağ qalanları xilas etmək üçün dağıntıları şumlaya bilməzdik. Ona görə də yalnız əl qüvvəsinə üstünlük verilirdi. Adi bir ehtiyatsızlıq faciənin miqyasının böyüməsi, məsələn, bir neçə xilasedicinin ölümü ilə nəticələnə bilərdi. Burada heç kim yatmayıb, hamı öz işi ilə məşğuldur. Amma etiraf etmək lazımdır ki, bu gündən sonra uçqunlar altında kiminsə sağ qalması ehtimalı azdır”.
A. Şərifov faciənin məsuliyyətini hamıdan öncə binanın tikintisi ilə məşğul olan şirkətin rəhbərliyinin daşıdığını bildirib: “Pul qazanmaqdan ötrü 9 mərtəbə əvəzinə 12-14 mərtəbə tikənlər bu faciədən nəticə çıxarmalıdırlar”. Uçan binanın yaxınlığındakı binaların taleyinə gəlincə, komissiya sədri bunun ekspertizanın yekun rəyindən asılı olacağını qeyd edib: “Bu, ən azı bir həftə vaxt aparacaq. Yaxınlıqdakı binaların sakinləri bizim xahişimizlə evlərini tərk ediblər. Onların mənzillərinin və əşyalarının mühafizəsi üçün binaların qarşısında polis postları qoyulub. Burada söhbət insan taleyindən gedir və heç kimə onların taleyi ilə oynamaq imkanı verilməyəcək. Mən elə bir vicdansız adam da görmürəm ki, bunların taleyi ilə oynasın”.
Baş nazirin müavini dağıntılardan götürülən beton nümunələrinin ekspertizadan keçirildiyini deyib: “Təəssüflə qeyd etməliyəm ki, betonun markası layihədə göstəriləndən 3 dəfə aşağı olub. “Mütəfəkkir” MTK tərəfindən yaxınlıqda tikilmiş və hazırda yaşayış olan binada da ilkin məlumata görə, eyni vəziyyətdir. Üstəlik, bina uçarkən yaxınlıqdakı binanın ikinci mərtəbəsini zədələyib. Görün hansısa şirkət rəhbərinin allahsızlığı nə qədər insanın faciəsinə səbəb olub”. A. Şərifov yaxınlıqdakı binaların hamısının söküləcəyi barədə xəbərləri şayiə adlandırıb: “Ekspertizanın nəticələri hələlik bəlli deyil. Digər tərəfdən, bir nəfərin, bir şirkətin məsuliyyətsizliyinə görə bu qədər insanı taleyin ümidinə buraxmaq olmaz. Kompensasiya məsələsinə gəlincə, bu, bir qədər vaxt aparan məsələdir. Bunun üçün araşdırmaq lazımdır ki, onlar mənzil almaq üçün kimə, hansı şirkətə nə qədər pul ödəyiblər”. /APA/