Hadisə

Ana səhifə

Hadisə

Orucəli Hacıyev: “Xilasetmə işləri sabah axşam başa çatdırılacaq”

05 sentyabr 2007 15:28 (UTC +04:00)

- Yasamal rayonunda hündür mərtəbəli binanın uçduğu ərazidə Fövqəladə Hallar Nazirliyinin apardığı xilasetmə işləri nə yerdədir?
- Biz bu il avqustun 28-dən sentyabrın 1-ə kimi ancaq sağ qaldıqları güman edilən insanları xilas etməklə məşğul olmuşuq. Həmin vaxt ağır texnikaları əraziyə buraxmaq təlimata əsasən uyğun sayılmırdı. İlk günlər Fövqəladə Hallar Nazirliyinin kinoloji xidməti və xilasetmə qrupları hadisə yerində işləyib. Sentyabrın 1-dən bu günə kimi isə artıq baş verən qəza lokallaşıb. Yəqin sabah bu işlər yekunlaşacaq. Qəzada həlak olan və hələlik cəsədləri tapılmayan digərlərinin binanın zirzəmi qatında olması güman edilir. Zirzəminin üstü isə demək olar ki, 6 metrlik beton qatı ilə örtülüb. Biz ölənlərin cəsədlərini yaxınlarına maksimum xətər toxunmadan çatdırmaq istəyirik. Texnikanı idarə edənlərin hamısına çox ehtiyatla işləmələri tapşırılıb. Əraziyə lazım olan bütün texnikalar yerləşdirilib. Hazırda hansısa texnikaya ehtiyac yoxdur. Azərbaycanda olan bütün ağır texnikalar və sərnişin daşıyan maşınlar bizim mülkü-müdafiə qoşunlarının qeydiyyatındadır. Təlimata görə, hər hansı fövqəladə hadisə baş verəndə bütün dövlət və özəl qurumlara aid ağır texnika müvəqqəti olaraq FHN-nin sərəncamına verilir.
- Hazırda xilasetmə və təmizləmə işləri hansı mərhələdədir?
- Artıq dağıntılar altında kiminsə sağ qalması ehtimalı olmadığına görə, ikinci mərhələ həyata keçirilir, yəni hərtərəfli təmizlənmə işləri aparılır. Bu əraziyə giriş yalnız bir tərəfdən olduğuna görə, təmizləmə işlərini də bir tərəfdən aparmaq mümkündür. Biz var gücümüzlə işləyirik. Əsas məsələlərdən biri də xilasetmə və təmizləmə işləri apararkən qonşu binalara xətər yetirməməkdir. Qəza baş verəndən bu günə qədər ağır texnikanın işi bir saat belə dayanmayıb.
- Bu hadisə ilə bağlı sakinləri evakuasiya olunan binalarda aparılan ekspert yoxlamalarının nəticəsi nə vaxt açıqlanacaq. Həmin binaların sökülməsi gözlənilirmi?
- Həmin binaların sakinlərinin narahat olduqlarını biz də bilirik. Onlar qohumlarının evlərində yaşayırlar. Bu bizi də çox narahat edir və onların vəziyyətini başa düşürük. Ən geci iki günə ekspertizanın rəyinin açıqlanacağı gözlənilir. Mənə elə gəlir ki, həmin binaların sökülməsinə ehtiyac olmayacaq. Çünki indiyə qədərki rəyə görə, çökən binanın yanındakı bina möhkəmdir və onun sökülməsinə ehtiyac yoxdur. Digər binalarla bağlı yoxlama isə davam edir.
- Binanın uçması ilə bağlı mətbuatda müxtəlif tənqidlər və şayiələr dərc olunur. Buna münasibətiniz necədir?
- Baş verən hadisə xarakterinə görə ən yüksək uçqun kateqoriyasına aiddir. 16 mərtəbəli bina 100 faiz çöküb, bir faiz də konstruksiya salamat deyil. Dünyanın heç bir yerində bu tipli qəzanın fəsadlarını az müddətdə aradan qaldırmaq mümkün olmayıb. Bizə göstəriləsi belə bir nümunə yoxdur. Bunu yazan mətbuat orqanları hansı ölkənin mütəxəssislərini dəvət etsələr, onlar da xilasetmə və təmizləmə işlərinin bu qədər sürətlə aparılmasına təəccüb edərlər. Biz qısa müddətdə xilasetmə işləri aparmağı bacardıq. Çox qısa müddətdə binanın qalıqları altından sağ qalan insanlar, cəsədlər çıxarılıb, ərazinin mühafizəsi təşkil edilib, bütün qüvvələr hadisə yerinə cəlb edilib.
- Xilasetmə işlərinə yardım göstərilməsi üçün FHN-nin bir neçə ölkəyə müraciət etdiyi bildirilir. Bu məlumatlar nə dərəcədə həqiqətəuyğundur?
- Bizim heç bir ölkənin köməyinə ehtiyacımız yoxdur və belə müraciətlər də olmayıb. . Ölkədə kifayət qədər texnika və mütəxəssislər var. Bütün lazım olan texnikalar FHN-nin sərəncamına verilib. Kiminsə dəvət olunmasına heç bir ehtiyac yoxdur.
- Xilasetmə tədbirləri nə vaxt yekunlaşacaq?
- Yəqin ki, sabah axşama bütün işlər yekunlaşacaq. Ancaq cəsədlərin dərin qatlarda olması mümkündür. Çünki 6 metr aşağıda zəmin qatları var və onlar hamısı çöküb. Biz güman edirik ki, cəsədlər yuxarı qatlardadır. Ona görə də sabah axşama həmin cəsədlərin çıxarılacağını düşünürük. Sona qədər bütün işlər görüləcək. /APA/