Hadisə

Ana səhifə

Hadisə

İtkin düşmüş Nizami rayonu sakininin və iki övladının yeri müəyyənləşib

13 dekabr 2007 09:36 (UTC +04:00)

Bu il dekabrın 9-da itkin düşmüş Nizami rayonu, Keşlə qəsəbəsi sakini, 31 yaşlı Marina Minaçeva və iki övladının yeri müəyyənləşib. Nizami Rayon Polis İdarəsinin 23-cü Polis Bölməsinin təhqiqatçısı Ağasadıq Bağırov APA-ya bildirib ki, milliyyətcə tatar olan Renat Yadigar oğlu Minaçev dekabrın 10-da bölməyə etdiyi müraciətdə M. Minaçevanın övladları Vəkil və Valeriya ilə birgə itkin düşdüyünü göstərib. Müraciətlə bağlı ailənin yaşadığı Abdulla Mirzəyev küçəsi, ev 59 ünvanına baxış keçirilib: “Baxış zamanı qadına və uşaqlara məxsus bütün paltarların, sənədlər götürüldüyü müəyyənləşdi. Renat Minaçev dedi ki, həyat yoldaşı ona dəfələrlə Rusiyanın Sankt-Peterburq şəhərində yaşayan anasının yanına getməyi təklif edib. Amma usta işləyən Renat işlərinin çox olmasının əsas gətirərək onunla razılaşmayıb”. A. Bağırov bildirib ki, R. Minaçev daha sonra polisə müraciət edərək xanımının ona zəng etdiyini deyib: “Həyat yoldaşı uşaqları ilə birgə anasının yanına yola düşdüyünü, hazırda Mahaçqalada olduğunu söyləyib”. Təhqiqatçı bu səbəbdən fakt üzrə cinayət işinin başlanmasının rədd olunduğunu, ancaq vətəndaşın axtarışının davam etdiriləcəyini qeyd edib. Hadisə ilə bağlı Rusiyanın hüquq-mühafizə orqanlarına müraciət olunacaq.
Qeyd edək ki, bu barədə “Yeni Müsavat” qəzeti məlumat yayıb. /APA/