Hərbi

Ana səhifə

Hərbi

Yavər Camalov: “Azərbaycan dünyada ən böyük - 23 və 30 mm çaplı snayperlərin istehsalını planlaşdırır” - MÜSAHİBƏ

Yavər Camalov: “Azərbaycan dünyada ən böyük - 23 və 30 mm çaplı snayperlərin istehsalını planlaşdırır” - <font color=red>MÜSAHİBƏ</font>

16 dekabr 2009 20:23 (UTC +04:00)

- Dekabrın 17-də Azərbaycan müdafiə sənayesi işçiləri peşə bayramlarını qeyd edəcək. Fəaliyyət göstərdiyi 4 ildə Müdafiə Sənayesi Nazirliyi hansı nailiyyətləri əldə edib?

- Mən rəhbərlik etdiyim qurumun ötən dövrdəki fəaliyyəti ilə bağlı onu deyə bilərəm ki, keçən 4 ildə Azərbaycanda müdafiə sənayesi qurulub. Dövlət başçısının şəxsi diqqəti və qayğısı sahəsində ötən dövrdə bir sıra müəssisələr yenidən qurulub, müasir avadanlıqlarla təmin olunaraq istifadəyə verilib. Aviasiya, naviqasiya, cihazqayırma və digər istiqamətlər üzrə 20-dən artıq ölkənin 60-dək firması ilə əməkdaşlıq yaradılıb. Müəssisələrdəki köhnə avadanlıqlar yenilənib, yüzlərlə yeni dəzgah alınıb. Həmçinin hesabat dövründə 21 obyektdə əsaslı tikinti aparılıb və yenidən qurulub. Beynəlxalq təcrübədə belə bir hal olmayıb ki, hərbi sənaye kompleksi 4 il ərzində yaradılsın və xaricdə keçirilən sərgilərdə iştirak etsin. Qısa zamanda istehsal etdiyimiz 27 adda müdafiə təyinatlı məhsulları, atcı silah, güllələr, aviasiya bombaları və hərbi texnikanı cari ilin aprel ayında İstanbulda keçirilən İDEF sərgisində nümayiş etdirdik. Dediyim kimi, qısa zaman kəsiyində yaratdığımız və istehsal etdiyimiz bu məhsullara hətta inkişaf etmiş ölkələrdən də böyük maraq oldu. Artıq həmin ölkələrlə alqı-satqı danışıqları aparılır. Türkiyənin bir şirkəti ilə danışıqlar yekunlaşıb və müqavilə bağlanıb. Müqaviləyə əsasən biz həmin şirkətə 30 milyon ədəd 7,62 mm çaplı döyüş sursatı satacağıq.

- Növbəti illər üçün planlarınız nədən ibarətdir?

- Ümumiyyətlə, 2010-cu ildə 12 istehsal sahəsinin yenidən qurulması və təmir işlərinin aparılması, həmçinin, həmin sahələrdə inkişaf etmiş ölkələrdən 8 adda müdafiə təyinatlı məhsulların istehsalı üçün müasir texnologiyaların alınıb gətirilməsi nəzərdə tutulur. Bundan əlavə, gələn ilin ikinci yarısında əlavə 5-6 adda məhsulun istehsalı üçün yeni texnologiyanın alınıb gətirilməsi barədə də danışıqlar aparırıq.

- Müdafiə sənayesi bu gün qeyri-neft sektorunda hansı çəkiyə malikdir? Yaxın illər üçün bu sektorda hansı səviyyədə artım gözlənilir?

- Onu deyə bilərəm ki, qeyri-neft sektorunda müdafiə sənayesinin çəkisi ilbəil artmaqdadır. Yaxın gələcəkdə bu sahədə böyük irəlləyişlər gözlənilir. İndidən bu istehsalın artım tempi barədə rəqəm səsləndirmək tezdir. Amma mühüm irəlləyişlərin olacağını və sanballı çəkiyə çatacağını deyə bilərəm.

- Bu il Cənubi Afrika Respublikasının (CAR) «Paramount Group» şirkəti ilə əməkdaşlıq çərçivəsində yeni texnikaların istehsalına başlanıb. Bu şirkətlə əməkdaşlığın perspektivdə davamı olacaqmı?

- «Paramount Group» şirkəti ilə hazırda əlaqələrimiz yüksək səviyyədədir. Həmin şirkətlə müştərək olaraq Bakıda 30 ədəd minaya davamlı matador və marauder tipli döyüş maşınının seriya ilə istehsalına başlanıb. Gələn ilin birinci yarısında bu maşınlar Müdafiə Nazirliyinə təhvil veriləcək. Hesab edirəm ki, əməkdaşlığımız gələcəkdə də davam etdiriləcək.

- Sovetlər dönəmində hazırda MSN-in tabeçiliyində olan «İqlim» və «Aviaaqreqat» zavodları aviasiya sənayesi üçün mühüm hissələr istehsal edib. Bu gün Azərbaycanın özünün bu imkanlarından istifadə edirmi? Ümumiyyətlə, bu müəssisələrin bazasında gələcəkdə hərbi təyyarələrin və vertolyotların istehsalının həyata keçirilməsi planlaşdırılırmı?

- Hazırda adını çəkdiyiniz bu müəssisələrdə Azərbaycan aviasiyası üçün ehtiyat hissələr istehsal olunur. Perspektivdə istifadə cəhətdən səmərəli olarsa, bu tip layihələrin də həyata keçirilməsi mümkündür. Biz eyni zamanda pilotsuz uçan aparatların istehsalı sahəsində də işlərə başlamışıq. Hesab edirəm ki bu layihə 2010-cu ildə reallaşacaq.

- Bu yaxınlarda Bakı yaxınlığında gəmiqayırma zavodunun tikintisinə dair Azərbaycan hökuməti ilə Sinqapur şirkəti arasında memorandum imzalandı. Azərbaycanın müdafiə sənayesi müəssisələrində istehsal edilən bəzi naviqasiya sistemlərindən bu zavodda inşa edilən gəmilərin tikintisində istifadə olunacaqmı?

- Bizim bəzi müəssisələrimizdə naviqasiya sistemləri istehsal edilir. Bu sahədə kifayət qədər təcrübəmiz və potensialımız var. Həmin şirkət əsasən mülki təyinatlı gəmilərin istehsalı ilə məşğul olacaq. Əgər hərbi təyinatlı gəmilərin istehsalı nəzərdə tutularsa, yəqin ki biz də o layihələrdə iştirak edəcəyik.

- İDEF sərgisində nümayiş etdirilən «İstiqlal» snayper tüfəngi diqqəti cəlb etdi. Azərbaycanın ilk milli atıcı silahı sayılan bu snayperin modernləşdirilməsi, eləcə də yeni atıcı silahların istehsalı planlarınızda varmı?

- Bizim İDEF sərgisində nümayiş etdirdiyimiz «İstiqlal» snayperi 14,5 mm çaplıdır. Hazırda həmin silahın bazasında İST 12,7, yəni 12,7 mm çaplı yeni modelin istehsalına başlamışıq. 2010 - 2011 –ci illərdə 23 və 30 mm çalı snayperlərin yaradılması və istehsalı planlaşdırılır. Bunlar sırf milli məhsul olacaq və yerli mütəxəssislər tərəfindən işləniləcək. Qeyd etmək istəyirəm ki, artıq «İnam», «Zəfər», «Zəfər-K» kimi NATO standartlarına cavab verən tapança modellərinin, həmçinin optik nişangahların, ov tüfəngləri üçün patronların istehsalına başlamışıq.

- Bəzi məlumatlar var idi ki, vaxtı ilə Sovet Ordusundan qalma, Azərbaycan Ordusunun inventarından çıxarılmış PDM və T-55 tanklarının bazasında, onların şassiləri üzərində yeni texnikaların yaradılması layihəsi üzərində işlənir. Bununla bağlı məlumat verərdiniz...

- Sovet Ordusundan qalma hərbi texnikaların modernizasiyasına və onların bazalarında yeni texnikaların istehsalına başlamışıq. Artıq Azərbaycanın bir sıra hərbi qurumları bizə 5 adda hərbi texnika verib. Hazırda həmin zirehli maşınların müasir tələblərə uyğun modernləşdirilməsi işləri aparılır.