İncəsənət

Ana səhifə

İncəsənət

Bəstəkar Musa Mirzəyev: “İndi dillər əzbəri olan Yeni il mahnısını Hikmət Ziya mənə zorla yazdırıb” - MÜSAHİBƏ - FOTO

Bəstəkar Musa Mirzəyev: “İndi dillər əzbəri olan Yeni il mahnısını Hikmət Ziya mənə zorla yazdırıb” - <font color=red>MÜSAHİBƏ - FOTO</font>

30 dekabr 2009 13:33 (UTC +04:00)

Bakı. Ülkər Qasımova – APA. Azərbaycanın xalq artisti, bəstəkar, 60-cı illərdə yazılmış və bu gündə dillər əzbəri olmuş “Yeni il gəldi” mahnısının müəllifi Musa Mirzəyevin APA-ya müsahibəsi

- Çox uzun illər keçməsinə baxmayaraq müəllifi olduğunuz “Yeni il gəldi” mahnısından sonra bu bayramla əlaqədar yaddaqalan mahnı yazılamayıb?

- Hazırda mahnıları elə insanlar bəstələyirlər ki, onların buna mənəvi haqqı yoxdur. Mahnı yazanda gərək melodiyanı fikirləşəsən. Daha səhərdən-axşama qədər sevgidən yazmaq olmaz ki... Bilirsiniz Azərbaycanda nə qədər Yeni il haqqında mahnı yazılıb? Amma çox təəssüf ki, bu mahnılardan heç biri yox, məhz müəllifi olduğum bu mahnı yaddaşlarda qalıb.

- “Yeni il gəldi” mahnısını neçənci ildə yazmısınız? Bu gün Yeni illə bağlı yazılan mahnıların yadda qalmamasının səbəbi nədir?

- “Yeni il gəldi” mahnısını 60-cı illərdə yazmışam. Əvvəllər televiziya və radiolarda uşaq verilişləri redaksiyaları var idi. Ancaq indi hamısını ləğv ediblər. Belə şey olmaz, ona görə də mahnı da yoxdur. Bu, anormallıqdır. Mənim uşaq xoru üçün çoxlu əsərlərim var idi və onların hər biri dillər əzbəri idi. Bu mahnılar indi də oxunurlar. Əlbəttə, yeni əsərlərim olacaq, ancaq Yeni illə bağlı mahnı yazmaq fikrim yoxdur. İndi dillər-əzbəri olan “Yeni il gəldi” mahnısını Hikmət Ziya mənə zorla yazdırıb. Bəlkə də o məni məcbur etməsəydi, heç bu mahnı da yaranmayacaqdı. Bu mövzuda gərək ekstra bir əsər çıxarasan ki, yaddaşlarda qalsın. Yeni il mahnısının cəmi bir ay ömrü var. İlin başqa fəsillərində bu mahnı oxunmur. Hər dəfə fərəh hiss keçirirəm ki, mənim zəhmətim hədər getməyib.

- Sizin simanızda yaşlı bəstəkarlara ayrılan diqqət Sizi qane edirmi?

- Uzun müddət mənə dövlət tərəfindən diqqət olmayıb. Daha doğrusu aidiyyəti orqan olan Azərbaycan Bəstəkarlar İttifaqı diqqət göstərməyib. O zamanlar çox paxıllıq olub və qarşımı kəsiblər. Hər şey onların əllərində idi, ona görə uzun müddət bu diqqətdən kənar qalmışam. Mən ilk fəxri adımı 50 yaşımda almışam. Halbuki həmin illərdə 25 il bütün Sovet İttifaqında mənim əsərlərim ifa olunub. Mənim əsərlərim Moskvanın ən mötəbər kollektivlərin ifasında səslənib. Həyatım başqalarından fərqlənib və o səbəbdən də bu cür diqqətsizliyə fikir vermirdim, çünki mənim əsərlərim tanınırdı.

- Hazırda nə yazırsınız?

- Hazırda səhhətimdə cüzi problemlər var, bu səbəbdən müalicə olunuram. Müalicəm bitəndən sonra dərhal yeni əsərlər yazmağa başlayacağam. Uşaqlar və yeniyetmələr üçün yeni yazılmış əsərlərim var, onlar üzərində işləyəcəyəm.

- Gənc bəstəkarların yaradıcılığını izləyirsinizmi? Onlara hansı tövsiyələriniz var?

- Tövsiyə edərdim ki, xalq musiqisini dərindən bilsinlər, böyük bəstəkarların əsərlərini daha yaxşı mənimsəsinlər. Bu gün Azərbaycan bəstəkarlığında eksperimental əsərlər çox yaranıb və buna da yersiz diqqət yetirirlər. Bu gün sintez də çoxdur, istedadlı insanın sintezi də istedadlı olur. İstedadsız isə heç nə edə bilmir. İstedadlı bəstəkarın yazdığı musiqilər hər zaman yaddaşlarda yaşayacaq.

- Oğlunuz İlyas Mirzəyev də bəstəkardır...

- Bəli, oğlum Türkiyədə fəaliyyət göstərir və olduqca böyük uğur qazanıb. Onun “Üç dəniz” simfoniyası Bəstəkarlar İttifaqının 75 illik yubileyi ilə bağlı tədbirin sonuncu günü ifa olundu. Bu əsər böyük müvəffəqiyyət də qazanıb. Oğlum Türkiyəyə çətin dövrdə getmişdi. Həmin dönəmdə ölkəmizdə olan durumla əlaqədar bir çox istedadlı ifaçılarımız ölkəni tərk etdilər, çünki burada dolanmaq mümkün deyildi.

- 2010-cu ildən nə gözləyirsiniz?

- Əmin-amanlıq gözləyirəm və Qarabağ məsələsində müsbət irəliləyiş olmasını istəyirəm. Ciddi musiqimizin daha geniş yayılması lazımdır, bunun üçün də gərək dövlət səviyyəsində tədbirlər həyata keçirilsin. Tək muğam deyil, ümumiyyətlə musiqimiz çox dərin və genişdir. Hər yazılmış əsəri təbliğ etmək düzgün deyil. Elə əsərlər var ki, o əsəri heç orkestrə yaxın buraxmaq olmaz. Bəstəkar üçün yaş həddi yoxdur və bunu dünya təcrübəsi də sübut edib. Bəstəkar son gününə kimi yaratmalıdır...

Qeyd: Musa Mirzəyev 1933-cü il yanvarın 26-da anadan olub. Azərbaycan respublikasının əməkdar incəsənət xadimi (1982), dosent (1998), professordur (2002).
“Lənkəran əfsanəsi” (1990), Piano üçün 5 uşaq Pyesi (1990), F.Əmirovun “Nizami” baletinin tamamlanması, okrestrləşdirilməsi və musiqi redaktəsi (1990 - 1991); Kamera orkestri üçün Simfoniya (1992); Piano üçün “Qəmli melodiya” (1993); Piano üçün konsert-rondo (1993); Skripka və piano üçün “Cəld hərəkət” (1994), Böyük simli orkestr üçün “Dahi sənətkara – Üzeyir Hacıbəyova ithaf” poeması (1998), Tatarıstan Respublikasının Dövlət Himninin bəstəkar – R.Yaxin aranjimanı və simfonik orkestri üçün transkripsiyası (1998), Kamera orkestri üçün “Polifonik simfoniya” (1999), Ə.Bədəlbəylinin “Qız qalası” baletinin yeni musiqi redaktəsi, simfonik orkestr üçün yenidən işlənməsi və aranjimanı (1999), Skripka və piano üçün “Romantik poema” (2000) və digər musiqi əsərləri məhz Musa Mirzəyevin adı ilə bağlıdır. Bəstəkar Azərbaycan xalq artisti fəxri adına, “Şöhrət” ordeninə layiq görülüb və prezident təqaüdçüsüdür.