APA-nın Mil-Muğan bürosunun verdiyi xəbərə görə, “İqtisadiyyat və Sənaye Nazirliyinin göstərdiyi elektron xidmətlər” mövzusunda Salyanda keçirilən tədbirdə aidiyyəti dövlət qurumları, Salyan və ətraf rayonların icra hakimiyyətlərinin nümayəndələri, Aran iqtisadi rayonunda fəaliyyət göstərən 100-ə yaxın sahibkar iştirak edib.
Nazirliyin nümayəndəsi Zaur Qasımov “Elektron Hökumət”ə dair Dövlət Proqramı çərçivəsində dövlət orqanlarında, o cümlədən İqtisadiyyat və Sənaye Nazirliyində elektron xidmətlərin tətbiqi genişləndirildiyini diqqətə çatdırıb. Bildirib ki, Prezidentin “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Fərmanına uyğun olaraq İqtisadiyyat və Sənaye Nazirliyinin internet saytında elektron xidmətlər bölməsi yaradılıb. Burada müxtəlif fəaliyyət növlərinə aid lisenziyaların, malların mənşə və keyfiyyət sertifikatlarının verilməsi üçün tələb olunan sənədlərin siyahısı və müraciət edən şəxs tərəfindən doldurulmalı olan ərizənin elektron forması yerləşdirilib.
Bölmə sahibkarlara tələb olunan sənədləri elektron formada təqdim etməklə yanaşı, həmin xidmətlər üçün qanunvericiliklə müəyyən olunmuş dövlət rüsumlarının və xidmət haqlarının ödənişini onlayn rejimində həyata keçirməyə imkan verir. İndiyədək 220 mindən artıq internet istifadəçisi bu xidmətdən yararlanıb.
Tədbirdə onlayn rejiminin istifadə proseduru nümayiş etdirilib. Sonda tədbir iştirakçılarını maraqlandıran suallar cavablandırılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
