Bakı-APA. “Bu gün Bakıda Avropa Şurası Parlament Assambleyasının (AŞPA) Büro iclasında qurumun vitse-prezidenti, fransalı deputat Rene Rukenin Azərbaycanın işğal edilmiş ərazilərinə etdiyi qanunsuz səfərə görə ölkəmizə buraxılmaması müzakirəyə çıxarılıb və təşkilatın iki il ərzində komitələrinin Azərbaycanda nəzərdə tutulan iclaslarını keçirməmək barədə qərar qəbul edilib”.
APA-nın xəbərinə görə, bunu millət vəkili Azay Quliyev bildirib.
A.Quliyev qeyd edib ki, Azərbaycanın ərazi bütövlüyünü tanıyan və Ermənistanın işğalçılıq siyasətini pisləyən AŞPA-nın belə bir qərar verməsi təəssüf doğurur: “Bu qərar ədalətli hesab edilə bilməz. Çünki Azərbaycan BMT tərəfindən rəsmən tanınmış sərhədlərinin kiminsə kobud şəkildə pozmasına və hər hansı bir şəxsin öz ərazisinə qanunsuz daxil olmasına biganə qala bilməz. Bu cür sərhəd pozucularının cəzalandırılması və adlarının «qara siyahı»ya salınması təbii qarşılanmalıdır. Belə bir addımın atılması Avropa Şurasının bütün üzv ölkələri kimi Azərbaycanın da suveren hüququdur və ilk dəfə deyil ki, ölkəmiz belə şəxslərlə bağlı prinsipal mövqe sərgiliyir”.
Millət vəkili xatırladıb ki, bu yaxınlarda ATƏT Parlament Assambleyasının (PA) Almaniya və Fransadan olan bəzi deputatları da eyni hərəkətə yol verdikləri üçün gələn ay Bakıda keçiriləcək 23-cü sessiyada iştirak etmək məqsədilə viza almaq tələblərinə rədd cavabı alıblar: “Lakin AŞPA-dan fərqli olaraq ATƏT PA Bakıda keçirəcəyi tədbiri təxirə salmadı və uzun müzakirələrdən sonra Azərbaycanın haqlı tələbini qəbul etdi. Həmin deputatlar Azərbaycanın işğal olunmuş ərazilərinə etdikləri səfərin qanunsuz olduğunu etiraf etdilər və ölkəmizdən rəsmən üzr istədilər. Onların üzürxahlığı nəzərə alındı və sessiyada iştirak etmək üçün viza istəkləri təmin edildi. Belə bir qərarın qəbulundan həm Azərbaycan, həm də ATƏT PA qazandı”.
A.Quliyev AŞPA-nın bürosunun belə bir addım atmamasından təəssüfləndiyini bildirib: “Ancaq keç kimin şübhəsi olmasın ki, Avropa Şurasına sədrlik etdiyi dövrdə xüsusi məqsədlərə hesablanmış belə bir qərarın qəbul edilməsindən Azərbaycan heç nə itirməyəcək. İtirən tək tərəf varsa, o da AŞPA-nın özü olacaq”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
