Hərbi

Ana səhifə

Hərbi

Azərbaycanın Rusiyada həbs olunan sabiq hərbi qulluqçusunun hansı maddələrlə ittiham edildiyi məlum olub - YENİLƏNİB 1 - VİDEO

10 yanvar 2014 07:57 (UTC +04:00)

APA-nın əldə etdiyi məlumata görə, İlqar Yadigarov Cinayət Məcəlləsinin 179-cu (mənimsəmə) və 313-cü (vəzifə saxtakarlığı) maddəsi ilə təqsirləndirilir.

Azərbaycan hüquq-mühafizə orqanları ötən ilin noyabrında onun tutulması üçün İnterpola müraciət edib.

***

saat 10.57

Bakı. Hafiz Heydərov - APA. Azərbaycan Müdafiə Nazirliyi Rusiyada həbs olunan keçmiş hərbi qulluqçu barədə açıqlama verib.

Nazirliyin mətbuat xidmətindən APA-ya bildirilib ki, Rusiyada tutulan keçmiş hərbi qulluqçu, Sumqayıt şəhər sakini, 1965-ci il təvəllüdlü Yadigarov İlqar Heydər oğludur.

O, 1986-cı ildə Yaroslav Ali hərbi Maliyyə Məktəbini bitirib. 4 aprel 2011-ci ildə isə xidməti uyğunsuzluğuna görə Silahlı Qüvvələr sıralarından tərxis olunub.

APA-nın əldə etdiyi məlumata görə, İ. Yadiqarov Müdafiə Nazirliyinin əməkdaşı olmayıb, Silahlı Qüvvələrin müxtəlif hərbi hissələrində çalışıb.

Qeyd edək ki, beynəlxalq axtarışda olan Azərbaycan Müdafiə Nazirliyinin sabiq əməkdaşı Rusiya paytaxtının “Domodedovo” hava limanında saxlanılıb. Onun saxlanılması barədə Rusiya Daxili İşlər Nazirliyinin İrkutsk vilayəti üzrə Baş İdarəsi məlumat yayıb.

Adı açıqlanmayan şəxs Azərbaycanın hüquq-mühafizə orqanları tərəfindən dələduzluq ittihamı ilə axtarışa verilib. O, 2010-cu ildə Müdafiə Nazirliyində çalışarkən xidməti vəzifəsindən istifadə edərək saxta mühasibatlıq sənədləri əsasında dövlətə təxminən 125 min dollar miqdarında ziyan vurmaqda ittiham olunur. 2011-ci ildə həmin şəxs saxta sənədlərlə Rusiya sərhədini keçib və İrkutsk vilayətinin Nijneudinsk rayonunun Xudoelansk kəndində fəhlə kimi işə düzəlib. İrkutsk polisi onun şəxsiyyətini müəyyənləşdirdikdən sonra Azərbaycan vətəndaşı gizlənməyə çalışıb və Moskvaya uçaraq oradan Rusiyanı tərk etməyə cəhd göstərib. İrkutsk polisi bu barədə Rusiya DİN-in “Domodedovo” aeroportundakı idarəsinə məlumat verib və azərbaycanlı hava limanında saxlanılıb.

***

saat 10.44

Moskva. Fərid Əkbərov - APA. Moskvanın "Domodedovo" hava limanında saxlanılan Azərbaycan Müdafiə Nazirliyinin keçmiş əməkdaşının adı məlum olub.

Bu barədə APA-nın Moskva müxbirinə Rusiya hüquq-mühafizə orqanlarından məlumat verilib.

Azərbaycan hüquq-mühafizə orqanları tərəfindən dələduzluqda ittiham olunaraq axtarışa verilən və "Domodedovo" hava limanında saxlanılan şəxsin 1965-ci il təvəllüdlü Azərbaycan vətəndaşı İlqar Y. olduğu bildirilib.