İnfrastruktur

Ana səhifə

İnfrastruktur

TRACECA-nın Azərbaycan Milli Katibliyinin rəhbəri: “Bakı-Tiflis-Qars dəmir yolu ilə daşımalar digər dəhlizlərə nisbətən ucuz başa gələcək”

24 iyul 2008 09:22 (UTC +04:00)

Bunu «APA-Economics»ə açıqlamasında TRACECA-nın Azərbaycan Milli Katibliyinin rəhbəri Akif Mustafayev bildirib. A. Mustafayevin sözlərinə görə, hazırda dəmir yolu ilə daşınan yüklər ümumilikdə TRACECA dəhlizi ilə daşınan yüklərin 55%-ni təşkil edir: «Proqnozlara görə, dəmir yolu işə düşəndən sonra ilk ildə bu yol vasitəsi ilə daşınan yüklər 3 mln. ton, sonrakı 5 ildə isə 10 mln. ton təşkil edəcək. Təkcə dəmir yolunda daşınan yüklərin çəkisinin 30%-dək artması gözlənilir».
BTQ dəmir yolu bağlantısının əhəmiyyətini şərh edən TRACECA milli katibi qeyd edib ki, bu layihə tək Azərbaycan üçün deyil, ümumilikdə region üçün böyük əhəmiyyətə malikdir: «Bu dəhlizdə daşımalar digər dəhlizlərə nisbətən ucuz olacaq. Dəmir yolunda daşıma, yükləmə-boşaltma xərcləri də digər nəqliyyat vasitələrinə nisbətən aşağıdır. Avropa və Asiyanı birləşdirəcək bu layihə şübhəsiz ki, digər ölkələrin də marağına səbəb olacaq. BTQ işə salınandan sonra Asiya və Avropa arasında yaranacaq bu yeni dəhliz digər alternativlərinə nisbətən 60 km qısa olacaq ki, bu da öz növbəsində çəkilən xərclərin azalması deməkdir».
A. Mustafayev BTQ dəmir yolu layihəsinin gələcəkdə Rusiya üçün də əlverişli dəhlizlərdən olacağını düşünür. Onun sözlərinə görə, hazırda Rusiya ilə Türkiyə arasında dəmir yolu bağlantısı olmadığından rəsmi Moskva məsələyə müsbət yanaşmalıdır: «Sovetlər birliyi dönəmində mövcud olmuş xətlər Cənubi Qafqaz regionundakı münaqişələr nəticəsində sıradan çıxıb və hazırda fəaliyyət göstərmir. Rusiya BTQ-nin işə düşməsindən yalnız qazana biləcək. Bu dəmir yolu vasitəsilə yüklər həm də şimaldan Türkiyə vasitəsilə Avropaya və digər bazarlara, eyni zamanda əks istiqamətlərə daşınacaq».
Gələcəkdə Qarsdan Naxçıvana da dəmir yolunun çəkilişinin nəzərdə tutulduğunu deyən A. Mustafayevin fikrincə, sözügedən dəhlizində tariflər elə səviyyədə olmalıdır ki, digər ölkələr üçün də cəlbedici sayılsın. Tariflər isə dəmir yolu işə salınan ərəfədə müəyyənləşdiriləcək.
Qeyd edək ki, BTQ-nin tikintisi ilə bağlı Azərbaycan, Gürcüstan və Türkiyə arasında yekun sənəd 2007-ci il fevralın 8-də Tiflisdə imzalanıb. Gürcüstan ərazisində yeni dəmir yolunun tikinti işlərinə 2007-ci il noyabrın 21-də start verilib, Türkiyə ərazisində isə tikinti işlərinə bu gün başlanılır.
Azərbaycan yolun Gürcüstan ərazisinə düşən hissəsinin tikintisi üçün bu ölkənin «Marabda-Karsi Dəmir Yolları» Məhdud Məsuliyyətli Cəmiyyətinə güzəştli şərtlərlə (illik 1%-lə 25 illiyə) 200 mln. ABŞ dolları məbləğində kredit ayırıb. Bu vəsait hesabına Gürcüstan ərazisində 29 km uzunluğunda yeni yol, Türkiyə ilə sərhəddə təkər dəyişmə məntəqəsi tikiləcək, həmçinin köhnə yol rekonstruksiya olunacaq. Layihənin ümumi dəyəri isə 600 mln. dollardan artıqdır.
Dəmir yolunun Gürcüstan hissəsinin tikintisini Azərbaycanın «Azərinşaatservis» şirkəti həyata keçirir. Dəmir yolunun 2011-ci ilin ortalarına qədər istifadəyə verilməsi planlaşdırılır.
Türkiyə ərazisində isə Gürcüstanla sərhəddən Qarsa qədər uzunluğu 76 km olan yeni dəmir yolu xətti tikiləcək.

Bakı_Tiflis_Qars_TRACECA