İnfrastruktur

Ana səhifə

İnfrastruktur

Azərbaycan Tarif Şurasının iclası olub

31 iyul 2008 16:00 (UTC +04:00)

Bakı. Nicat Mustafayev - APA-Economics. Azərbaycan Tarif (qiymət) Şurasının növbəti iclası keçirilib. Tarif (qiymət) Şurasının Katibliyindən «APA-Economics»ə verilən məlumata görə, iclasda Dövlət Dəniz Administrasiyası tərəfindən göstərilən xidmətlərin tariflərə dəyişiklik edilməsi, küçə reklamlarının yerləşdirilməsi və yayımı üçün reklam tarifləri, dövlət mühafizəsinə götürülmüş abidələr və onların ərazisində göstərilməsi nəzərdə tutulan xidmətlərin tarifləri, Ekologiya və Təbii Sərvətlər Nazirliyi tərəfindən ovçuluq biletinin verilməsi qiyməti ilə bağlı məsələlər müzakirə edilib və müvafiq qərarlar qəbul olunub.

Tarif (qiymət) Şurasının qərarına əsasən, Ekologiya və Təbii Sərvətlər Nazirliyi tərəfindən verilən ovçuluq biletinin qiyməti 11 manat səviyyəsində (iki il üçün) müəyyənləşdirilib. Bundan başqa, Dövlət Dəniz Administrasiyası tərəfindən Beynəlxalq Konvensiyanın tələblərinə uyğun olaraq «Dənizçinin Qeyd Kitabçası»nın Administrasiyanın xidmət növlərinə daxil edildiyi və qurumun müvafiq müraciəti nəzərə alınaraq 1 ədəd kitabçanın qiyməti 22 manat səviyyəsində təsdiq edilib.

Bundan başqa, küçə reklamlarının yerləşdirilməsi və yayımı üçün reklam tariflərinin təkliflərdə nəzərdə tutulandan aşağı - Bakı şəhəri üzrə mövcud səviyyədə saxlanılması, regionlarda sahibkarlıq fəaliyyətinin stimullaşdırılması məqsədilə Sumqayıt, Gəncə, Mingəçevir, Şirvan, Xırdalan şəhərləri üzrə tariflərə 0,7 əmsalının, Abşeron rayonu və respublikanın digər regionları üzrə isə tariflərə isə 0,5 əmsalının tətbiq edilməsi qərara alınıb. Eyni zamanda, reklam daşıyıcısının yerləşdirilməsinə görə icazə sənədi üçün birdəfəlik ödəniş olaraq Bakı şəhəri üzrə zonadan asılı olmayaraq 70 manat, Sumqayıt, Gəncə, Mingəçevir, Şirvan, Xırdalan şəhərləri üçün 50 manat, Abşeron rayonu və ölkənin digər regionları üzrə isə 35 manat birdəfəlik ödəniş müəyyənləşdirilib.

Tarif (qiymət) Şurasının iclasında dövlət mühafizəsinə götürülmüş abidələr və onların ərazisində göstərilməsi nəzərdə tutulan xidmətlərin tarifləri ilə bağlı Mədəniyyət və Turizm Nazirliyinin müraciəti də müzakirə edilib və müvafiq dəqiqləşdirmələr aparılmaqla yenidən işlənərək təqdim olunması qərara alınıb.
Dövlət Dəniz Administrasiyasının yeni tarifləri 2008-ci ilin avqustun 1-dən, digərlər tariflər isə sentyabrın 1-dən tətbiq ediləcək.

Azərbaycan_Tarif_Şurası