İnfrastruktur

Ana səhifə

İnfrastruktur

Azərbaycanın rabitə və informasiya texnologiyaları naziri Ümumdünya Poçt İttifaqının Konqresində iştirak edəcək

05 avqust 2008 09:34 (UTC +04:00)

Bakı. İlhamə İsabalayeva - APA-Economics. Azərbaycanın rabitə və informasiya texnologiyaları naziri Əli Abbasov Ümumdünya Poçt İttifaqının (ÜPİ) iyulun 23-dən Cenevrədə keçirilməsinə başlanılan 24-cü konqresinin bağlanış mərasimində iştirak etmək üçün İsveçrəyə səfər edəcək. Rabitə və İnformasiya Texnologiyaları Nazirliyindən “APA-Economics”ə verilən məlumata görə, konqresin yekun mərasimi avqustun 11-12-də keçiriləcək. 190-dan çox ölkənin qatıldığı konqresdə hazırda Azərbaycan nümayəndə heyəti də iştirak edir.
Nazirlikdən bildirilib ki, tədbirdə üzv ölkələr növbəti konqres keçirilənə kimi - 2012-ci ilədək poçt sahəsinin inkişafı məqsədilə görülməsi vacib olan tədbirlər barəsində müzakirələr aparırlar. Konqresdə həm də ÜPİ-yə yeni baş direktorun seçilməsi, eyni zamanda Adminstrativ və Poçt İstismarı Şuralarının tərkiblərinin dəyişdirilməsi məsələsinə baxılacaq. Konqresdə Azərbaycan da hər iki şuraya üzv olmaq üçün namizədliyini irəli sürüb. Şuralara 193 ölkə arasından yalnız 40 ölkə üzv seçilə bilər. Azərbaycan Adminstrativ Şuraya 23-cü konqresdə üzv seçilsə də, Poçt İstismarı Şurasına üzv qəbul olunmaq üçün namizədliyinin ilk dəfə verib.
Qeyd edək ki, ÜPİ-nin konqresi 4 ildən bir keçirilir. Təşkilatın 23-cü konqresi 2004-cü ildə Buxarestdə olub. Azərbaycan ÜPİ-yə 1993-cü ilin aprelində üzv olub.

RİTN