İnfrastruktur

Ana səhifə

İnfrastruktur

Bu ilin birinci yarısında Azərbaycanda orta və iri dövlət müəssisələrinin bazasında 8 səhmdar cəmiyyəti yaradılıb

11 avqust 2008 10:16 (UTC +04:00)

Bakı. Rəşad Süleymanov - APA-Economics. Cari ilin birinci yarısında «Azərbaycan Respublikasında dövlət əmlakının özəlləşdirilməsinin II Dövlət Proqramı» çərçivəsində 1030 kiçik dövlət müəssisə və obyekti özəlləşdirilib, orta və iri dövlət müəssisələrinin bazasında 8 səhmdar cəmiyyəti yaradılıb. Bu barədə «APA-Economics»ə Dövlət Əmlakının İdarə Edilməsi üzrə Dövlət Komitəsindən (DƏİEDX) məlumat verilib.

Bununla yanaşı, 2006-cı ilin avqustunda özəlləşdirməyə açılmış səhiyyə, təhsil, idman və mədəniyyət müəssisə və obyektlərindən 149-u artıq özəlləşdirilib. Səhmdar cəmiyyətlərinin səhmlərinin satışı üzrə 33 hərrac keçirilib. Bu hərraclarda 90-a yaxın səhmdar cəmiyyətinin səhmləri satılıb. Cari ildə 460-a yaxın müəssisə və obyektin yerləşdiyi torpaq sahəsi özəlləşdirilib, 150-ə yaxın obyektin torpaq sahəsi icarəyə verilib. Fiziki və hüquqi şəxslərə dövlət əmlakının satılmasına və mülkiyyət hüquqlarının əldə edilməsinə dair 1650-ə yaxın şəhadətnamə verilib. Hesabat dövründə 1300-ə yaxın müəssisə və obyektin texniki pasportu, 2400-ə yaxın qeyri-yaşayış sahəsinin plan cizgiləri tərtib olunub.

Hesabat dövründə Azərbaycanın regionlarında yerləşən və bu bölgələrin iqtisadiyyatı üçün xüsusi əhəmiyyət kəsb edən kənd təsərrüfatı məhsullarının emalı, taxılçılıq, səhiyyə, xidmət, sənaye, şərabçılıq və digər sahələrə aid 9 səhmdar cəmiyyətinin səhmləri investisiya müsabiqəsi vasitəsi ilə özəlləşdirilib. Bu müsabiqələr nəticəsində imzalanmış müqavilələrə əsasən, investorlar tərəfindən müəssisələrə 13 mln. manat həcmində investisiya qoyuluşları həyata keçiriləcək. Nəticədə 800-dən çox yeni iş yerinin yaradılması nəzərdə tutulur.

İnvestisiya müsabiqəsi vasitəsilə özəlləşdirilmiş müəssisələrlə bağlanmış müqavilələr üzrə müsabiqə qalibləri tərəfindən 2008-ci ilin birinci yarısında 16,1 mln. manat məbləğində investisiya qoyulub, dövlət büdcəsinə 2,2 mln. manat vəsait ödənilib və 530-a yaxın yeni iş yeri açılıb. İnvestisiya müsabiqəsi vasitəsi ilə özəlləşdirilmiş 8 müəssisə üzrə mülkiyyət hüququ alıcılara keçib.

DƏİEDX