İnfrastruktur

Ana səhifə

İnfrastruktur

Bakı-Rusiya sərhədi avtomobil yolunun 100 km-lik hissəsinin betonlanması başa çatıb

15 avqust 2008 09:03 (UTC +04:00)

Bakı. Nicat Mustafayev – APA-Economics. Azərbaycanın «Akkord» Şirkətlər Qrupu Bakı-Rusiya sərhədi avtomobil yolunun 100 km-lik hissəsinin betonlanması işini başa çatdırıb.
«Akkord»un Bakıdakı baş ofisindən «APA-Economics»ə verilən məlumata görə, hazırda Bakı-Quba-Rusiya Federasiyası ilə dövlət sərhədi avtomobil yolunda da yenidənqurma işlərini davam etdirir. Bu layihə çərçivəsində «Akkord İnşaat-Sənaye» şirkətinin həyata keçirəcəyi əsas iş yolunun 16-134 km hissəsinin beton örtük tikməklə yenidən qurulmasından ibarətdir. Bu məqsədlə şirkətin 7 min işçi qüvvəsi və 3 minə yaxın yol tikintisi texnikası səfərbər edilib. İşlərin sürətlə aparılması üçün ərazi hissələrə bölünüb - 16-44 km, 44-89 km və 89-134 km. Artıq 120 km-lik ərazi boyu torpaq-bərkitmə işlərinin xeyli hissəsi yerinə yetirilib. Hazırda isə torpaq-bərkitmə işləri ilə paralel olaraq ərazidən keçən kommunikasiya xətləri dəyişdirilir, suötürücü qurğular, körpü və keçidlər tikilir.
«Artıq yolun iki istiqamət üzrə 100 km hissəsinə beton döşənib, o cümlədən Bakı-Sumqayıt yolunda beton döşəmə işi başa çatdırılıb. Hazırda həmin istiqamətdə yolda son tamamlama işləri aparılır. Yolun 3 km hissəsində işıqlandırma dirəkləri quraşdırılıb və istinad divarları çəkilib», - deyə şirkətdən bildirilib.
Ümumilikdə, Bakı-Quba-Rusiya sərhədi avtomobil yolu üzərində 22 körpü və yolötürücü, 2 tunel, 1 dəmiryolu körpüsü inşa ediləcək. Yol üzərində 9 heyvan keçidi, kommunikasiya xətləri üçün 7 yolötürücü qurğular da nəzərdə tutulub. Bakı-Quba-Rusiya sərhədi avtomobil yolunda beton örtüyünün ümumi qalınlığı 28 sm-dir.
Bundan başqa, «Akkord İnşaat-Sənaye» ASC Bakı-Şamaxı yolunun 9 km-dən 77-ci km-dək olan 68 km-lik hissəsində yolun yenidən qurulması və Şərq-Qərb avtomobil magistralının tərkib hissəsi oln Qazax-Gürcüstan sərhədi (Qırmızı körpü) avtomobil yolunun son 36 km-nin yenidən tikilməsi işlərini həyata keçirir.
Bakı-Şamaxı yolunda aparılan işlərin yerinə yetirilməsi üçün əraziyə 500-dək işçi, 200-dək maşın-mexanizm, ağır texnika cəlb olunub. Hazırda ərazidən keçən kommunikasiya xətləri dəyişdirilir. Yolun 31 km-lik hissəsində asfalt salınması üçün hazırlıq işləri aparılır, bəzi ərazilərdə torpaq qazma-tökmə işləri başa çatdırılıb.
Qazax-Gürcüstan (Qırmızı körpü) avtomobil yolunun çəkilişinə bu ilin iyul ayında start verilib. Hərəkətin təhlükəsizliyi və fasiləsizliyini təmin etmək üçün ilk növbədə 20 gün ərzində ərazidə 15 km-lik müvəqqəti yol salınıb. Daha sonra yolun təhkim hissəsində olan yararsız torpaq kütləsi kənarlaşdırılıb və torpaq yatağı işlərinə başlanılıb. Artıq 6 km-lik hissədə bu işlər yerinə yetirilib. Süni qurğular üçün 1 250 mm-lik borular əraziyə gətirilib. Yolda çalışmaq üçün 60 nəfərlik işçi qüvvəsi və lazımi texnika səfərbər edilib. Yolun 16, 21 və 26 km-də böyük tipli üç körpünün tikintisi nəzərdə tutulub.
Qeyd edək ki, «Azəryolservis» ASC-nin sifarişi ilə inşa edilən yol Asiya İnkişaf Bankı tərəfindən maliyyələşdirilir. Podratçısı «İmpresa» şirkəti olan layihədə «Akkord İnşaat-Sənaye» ASC subpodratçı qismində fəaliyyət göstərir. Məşhur «Kocks GmbH.» şirkəti isə layihə üzrə məsləhətçi qismində cıxış edir.