İnfrastruktur

Ana səhifə

İnfrastruktur

TRT Azərbaycanda yayımını genişləndirməyə başlayır

09 sentyabr 2008 13:11 (UTC +04:00)

Bakı. İlhamə İsabalayeva-APA-Economics. Türkiyənin TRT kanalı Azərbaycan ərazisində yayım dairəsini genişləndirmək üçün tələb olunan avadanlıqların bir hissəsini ölkəyə gətirib. Azərbaycan Rabitə və İnformasiya Texnologiyaları Nazirliyinin (RİTN) “Teleradio” İstehsalat Birliyindən “APA-Economics”ə bildirilib ki, hazırda TRT-nin Azərbaycan əhalisi üzrə əhatə göstəricisi 40-45%-dir. Kanal yalnız Bakı, Abşeron, Gəncədə yayımlanır.

Türkiyə Baş Nazirinin Aparatının Türk Əməkdaşlıq və İnkişaf Agentliyi ilə RİTN və Azərbaycan Milli Televiziya və Radio Şurası arasında televiziya yayımı sahəsində bu il yanvarın 24-də imzalanmış texniki xidmət haqqında müqaviləyə əsasən isə TRT-nin Azərbaycan ərazisində yayımı 90%-ə çatmalıdır. Bunun üçün TRT Azərbaycanda 7 ədəd 5 kVt-lıq, 2 ədəd 2 kVt-lıq və 1 ədəd 1 kVt-lıq TV verici qurğuların anten-fider sistemləri və digər lazımi avadanlıqlar yerləşdirilməlidir.

Avadanlıqlar Azərbaycanın Bakı, Lerik, Gəncə, Zaqatala, Ağsu, Ağstafa, Quba rayonlarında və Naxçıvan Muxtar Respublikasında (Duzdağ, Dəstə və Sədərək) quraşdırılacaq. Avadanlıqların quraşdırılmasından sonra - sentyabr-oktyabr aylarında TRT-nin Bakı və Gəncədə yayım keyfiyyəti yüksələcək, cənub rayonlarında, o cümlədən Naxçıvanda isə yayım mümkün olacaq.

TRT