İnfrastruktur

Ana səhifə

İnfrastruktur

Qurban Nəzirov: «Qars-Gümrü dəmir yolu Bakı-Tiflis-Qars yolunun işinə mane olmayacaq»

13 oktyabr 2008 10:34 (UTC +04:00)

Bakı. Rəşad Süleymanov – APA-Economics. Bakı-Tiflis-Qars (BTQ) yeni dəmir yolunun Gürcüstan və Türkiyə ərazisində tikinti işlərinə başlanılıb. «APA-Economics»in məlumatına görə, bunu Azərbaycan Dövlət Dəmir Yolunun (ADDY) baş mühəndisi Qurban Nəzirov bildirib.
Q.Nəzirovun sözlərinə görə, Türkiyə ərazisində Qarsdan Gürcüstanla dövlət sərhədinədək ərazidə tikinti işlərinə start verilib. Gürcüstan ərazisində isə Kartsaxi məntəqəsindən Türkiyə ilə dövlət sərhədinədək olan 29,5 km məsafədə «Azərinşaatservis» şirkəti tərəfindən torpaq yatağının hazırlanmasına başlanılıb.
«Eyni zamanda Marabda-Axalkələk sahəsində hazırlıq işləri görülür. Koordinasiya Şurası həmin ərazidə yolun reabilitasiyası layihəsini təsdiqləyib», - deyə Q.Nəzirov vurğulayıb.
Q.Nəzirov əlavə edib ki, gələcəkdə Türkiyə ilə Ermənistan arasında ehtimal olunan Qars-Gümrü dəmir yolunun açılması BTQ-nin fəaliyyətinə mane olmayacaq: Bunun BTQ layihəsinə heç bir aidiyyəti yoxdur».
Qeyd edək ki, BTQ-nin tikintisi ilə bağlı Azərbaycan, Gürcüstan və Türkiyə arasında yekun sənəd 2007-ci il fevralın 8-də Tiflisdə imzalanıb. Yeni dəmir yolunun tikinti işlərinə 2007-ci il noyabrın 21-də start verilib. Azərbaycan yolun Gürcüstan ərazisinə düşən hissəsinin tikintisi üçün bu ölkənin «Marabda-Karsi Dəmir Yolları» MMC-yə güzəştli şərtlərlə (illik 1%-lə 25 illiyə) 200 mln. ABŞ dolları məbləğində kredit ayırıb. Bu vəsait hesabına Gürcüstan ərazisində 29 km uzunluğunda yeni yol, Türkiyə ilə sərhəddə təkər dəyişmə məntəqəsi tikiləcək, həmçinin köhnə yol rekonstruksiya olunacaq. Layihənin ümumi dəyəri isə 600 mln. dollardan artıqdır.
Dəmir yolunun Gürcüstan hissəsinin tikintisini Azərbaycanın «Azərinşaatservis» şirkəti həyata keçirir. Dəmir yolunun 2011-ci ilin ortalarına qədər istifadəyə verilməsi planlaşdırılır.
Türkiyə ərazisində isə Gürcüstanla sərhəddən Qarsa qədər uzunluğu 76 km olan yeni dəmir yolu xətti tikiləcək.