İnfrastruktur

Ana səhifə

İnfrastruktur

Azərbaycanın tikinti materialları bazarında noyabrda qiymətlər orta hesabla 26% düşüb

11 dekabr 2008 14:16 (UTC +04:00)

Bakı. Rəşad Süleymanov – APA-Economics. Dünya maliyyə böhranı nəticəsində bu ilin noyabr ayında Azərbaycana idxal olunan tikinti materialları ilə yanaşı, bəzi yerli istehsal məhsullarının da qiymətlərində yüksək faizli azalma baş verib. Bu barədə «APA-Economics»ə «Əmlak Bazarı İştirakçıları» İctimai Birliyindən məlumat verilib.
İctimai Birlik tərəfindən noyabr ayı ərzində Bakı şəhəri üzrə tikinti materialları bazarında 36 adda, 82 çeşiddə tikinti materiallarının qiyməti izlənilib. Araşdırılan məhsullar üzrə yerli istehsalın həcmi 51,2% təşkil edib. Noyabr ayında 82 adda məhsuldan 27-si üzrə qiymət azalması, 40-ı üzrə stabillik, 15-i üzrə isə qiymət artımı müşahidə edilib.
Ay ərzində bazarda formalaşan orta qiymətlərdə azalma oktyabr ayı ilə müqayisədə 26,3% təşkil edib. Xüsusilə də orta qiymətin kəskin azalmasına səbəb kimi tikinti materiallarının orta qiymət portfelində əsas paya sahib olan armaturun qiymətinin 35%-dən artıq enməsi göstərilir. Armaturla yanaşı, qiyməti yüksək olan taxta, DSP, dam örtüyü, dəmir təbəqə, şüşə pambıq kimi tikinti materiallarının qiymətlərinin enməsi orta qiymətdə kəskin azalmaya təsir göstərib.
Ay ərzində armatur 36,3%, şüşə pambıq 28,9%, dəmir təbəqə 26,3%, sink təbəqə 19,8%, alkopan 16,7%, PVA kleyi 12,5%, mişar daşı 10,5%, laminat-parket 9,8%, şifer 6,9%, dikt 3,8%, DSP 2,7%, taxta 2,2%, zamaska 1%, alçipan 0,9% ucuzlaşıb. Bunlardan fərqli olaraq şüşə 50%, plastik boru 16%, otsep 15,8%, qum 13,8%, künyə 11,2%, çınqıl 5,9%, katinka 1,8%, şveller 1,8%, dəmir boru isə 0,5% bahalaşıb.