İnfrastruktur

Ana səhifə

İnfrastruktur

Azərbaycan İnternet Forumu ölkənin İKT bazarında yaranmış vəziyyətlə bağlı Rabitə və İnformasiya Texnologiyaları Nazirliyinə məktub göndərib

19 dekabr 2008 13:35 (UTC +04:00)

Bakı. Nicat Mustafayev – APA-Economics. Azərbaycan İnternet Forumunun (AİF) rəhbəri Osman Gündüz ölkənin İnternet və İKT bazarında yaranmış vəziyyət, həmçinin Rabitə və İnformasiya Texnologiyaları Nazirliyi (RİTN) ilə vətəndaş cəmiyyəti arasında münasibətlərin vəziyyəti ilə bağlı rabitə və informasiya texnologiyaları naziri Əli Abbasova məktub göndərib.
AİF-dən «APA-Economics»ə verilən məlumata görə, məktubda ölkənin İnternet bazarında xeyli müddət davam etməsi və dözülməz həddə çatması bəradə bildirilir. RİTN-ə və bütövlükdə ölkəyə fayda gətirməyən bu vəziyyətin, İnternet bazarında sərbəst və azad rəqabətin formalaşmaması, İnternet xidmətlərinin kəskin bahalığı və keyfiyyətsizliyinin səbəblərini araşdırmaq və aradan qaldırmaq yollarını müəyyənləşdirmək üçün birgə monitorinqin keçirilməsi və digər zəruri addımların atılmasına diqqət yönəlib.
Məktubda son dövrlərdə RİTN-in bir sıra rəsmi şəxsləri tərəfindən qeyri-qanuni addımların atılması, qanunsuz və yanlış bəyanatların səslənməsi məsələsinə də toxunulub. Qeyd olunub ki, RİTN rəsmiləri tərəfindən müvafiq qurumlar cəlb olunmadan qanunvericiliyin və beynəlxalq normaların tələblərinə zidd olan hüquqi sənədlər hazırlanır, milli İnternet ünvanların qeydiyyatı prosesinin RİTN tərəfindən qeyri-qanuni olaraq həyata keçirilməsinə haqq qazandıran çıxışlar edilir. Məktubda RİTN rəsmiləri tərəfindən bir sıra hallarda ictimaiyyətdə yanlış təsəvvürlərin, reallıqdan xeyli uzaq olan rəyin formalaşmasına xidmət edən açıqlamaların verildiyi bildirilib.
Məktubda həmçinin RİTN ilə vətəndaş cəmiyyəti arasında münasibətlərin, qarşılıqlı əməkdaşlığın zəifləməsi amilinə və onu yaradan səbəblərə diqqət yönəldilib. Vətəndaş cəmiyyəti subyektləri ilə əməkdaşlığın yetərli olmamasının, adı çəkilən qurumdan zəruri informasiyaların (Regional İnnovasiya Zonası, Milli Peyk Sistemi, Elektron Hökumət quruculuğu haqqında və s.) əldə edilməsi imkanlarının mümkünsüzlüyünün sonda bu sahədə qeyri-sağlam mühitin formalaşmasına gətirib çıxaracağı vurğulanıb.
Məktubda İnternet bazarındakı köklü problemlərin həlli ilə bağlı İnternet ictimaiyyətinin geniş təbəqələrinin iştirakı ilə son dövrlərdə AİF tərəfindən aparılan müzakirələr barədə məlumat verilib və bu qurumun irəli sürdüyü təkliflərə RİTN tərəfindən baxılması xahiş olunub.