İnfrastruktur

Ana səhifə

İnfrastruktur

Azərbaycan Tarif Şurası Rabitə və İnformasiya Texnologiyaları Nazirliyinin təklifləri ilə bağlı qərar qəbul edib

30 dekabr 2008 16:44 (UTC +04:00)

Bakı. Ramil Məmmədli-APA. Bu gün Azərbaycan Tarif Şurasının növbəti iclası keçirilib. Tarif Şurasının katibliyindən APA-ya verilən xəbərə görə, iclasda Rabitə və İnformasiya Texnologiyaları Nazirliyinin təklifləri əsasında iki məsələyə baxılıb.

Şuranın qərarı ilə fiziki xətlə telefonlaşdırılması mümkün olmayan ərazilərdə yerləşən təhsil müəssisələri üçün “Teleradio” İstehsalat Birliyinə məxsus bina, sahə və qüllələrdə kənar təşkilatların avadanlıqlarının yerləşdirilməsi və xidmət göstərilməsinə görə aylıq tariflərə 80% güzəşt tətbiq olunacaq. Qərara əsasən, avadanlıqlara görə tətbiq olunan tariflər 0,54 manatdan 53,6 manatadək (ƏDV-siz), anten sistemlərinə görə tətbiq edilən tariflər isə 2 manatdan 105 manatadək (ƏDV-siz) səviyyəsində təsdiq olunub. Bu tariflər uyğun olaraq, əvvəllər 2,68 manatdan 268 manatadək (ƏDV-siz) və 10 manatdan 525 manatadək (ƏDV-siz) təşkil edirdi. Yeni tariflərin qəbul edilməsi təhsil sektorunda uyğun xərclərə qənaət olunmasına imkan yaradacaq.

Şuranın iclasında internet xidmətinin göstərilməsi üçün tələb olunan rəqəmsal kanalların tarifləri də müzakirə olunub və müvafiq qərar qəbul edilib. Qərara əsasən, 2 Mbit/san şəhərdaxili rəqəmsal kanalların (portların) istifadəyə verilməsi tarifləri digər abonentlər (büdcə təşkilatları istisna olmaqla) üçün 1200 manatdan 600 manata (50%), onlardan aylıq istifadə tarifləri isə 320 manatdan 300 manata (6,3%), rəqəmsal rabitə kanallarının qoşulma və aylıq istifadə (Bakı şəhəri istisna olmaqla) tarifləri 240 manatdan 200 manata, hər tam və natamam 50 km məsafəyə görə 2 Mbit/san tutumundan istifadə tarifləri isə 180 manatdan 150 manata (16,7%) endirilib.

Bu qərar internet provayderləri xidmətlərinin maya dəyərinin azalmasına, nəticə etibarilə son istifadəçilər üçün internet xidməti tariflərinin ən azı 15-20% aşağı salınmasına imkan yaradacaq.

Təsdiq olunmuş yeni tariflər 2009-cu ilin 15 yanvar tarixindən qüvvəyə minəcək.