İnfrastruktur

Ana səhifə

İnfrastruktur

Azərbaycanda Virtual Universitet yaradılıb

20 aprel 2009 12:16 (UTC +04:00)

Bakı. Aynur Vəliyeva – APA-Economics. Bakı Dövlət Universitetində (BDU) tyutorların (məsafəli təlim sistemində müəllim) hazırlanması və virtual universitet sisteminin yaradılması üzrə layihə həyata keçirilir. BDU-dan «APA-Economics»ə verilən məlumata əsasən, Azərbaycanda dövlət ali təhsil müəssisələri arasında tələbələrə virtual xidmət təklif edən yeganə universitet məhz BDU-dur.
Virtual Universitet Avropa İttifaqının TACİS Proqramının «Cənubi Qafqazda elektron cəmiyyətin inkişafı Layihəsi» çərçivəsində AzRENA, BDU və Almaniyanın IMC şirkətinin birgə səyləri nəticəsində yaradılıb.
Hazırda BDU-da tələbələrin imkanlarını artırmaq məqsədilə, yəni virtual universitetə çıxışı asanlaşdırmaq, otaq və kompüterlərdən asılılığı minimuma endirmək üçün test rejimində xüsusi köşklər təqdim edilib. Bu köşklər gün ərzində 24 saat xidmət təklif edir. Gələcəkdə belə mobil köşklərin hər tədris binasının əsas girişində, kitabxana və oxu zallarının, hər fakültə dekanlıqlarının qarşısında yerləşdirilməsi nəzərdə tutulur. Köşklərin işi ilə http://eu.bsu.az ünvanında tanış olmaq mümkündür.
Qeyd edək ki, Virtual Universitet real universitetdə tədrisə aid baş verən bütün proseslərin virtual mühitdə əksidir. Virtual Universitet Qərbin bütün ali təhsil müəssisələrində tələbələrə təklif olunan auditoriya və laboratoriyalar, kitabxana və oxu zalları, poliklinika, idman zalları və sair kimi xidmət növlərindən biridir. Virtual Universitetin imkanlarından biri tələbələrə tədris olunan hər bir fənnin tədris materiallarının elektron versiyalarını, yəni müəllim tərəfindən təqdim olunmuş mühazirə, test, tapşırıq, cədvəl, şəkil və sair fənnə aid bütün tədris materiallarının tələbələrə təklif olunmasıdır. Virtual Universitetin digər imkanları arasında tələbələr arasında fərdi ismarıclar, müxtəlif mövzuların forumlarda müzakirəsi, universitet daxili xəbərlərin bütün tələbə kütləsinə çatdırılması, müəllimlərin müzakirəsi və s. göstərmək olar.
Qeyd edək ki, ümumi dəyəri 48 min manat olan bu layihə çərçivəsində müasir standartlara uyğun peşəkar tyutor komandası hazırlanıb, Virtual Universitet tələbələrin istifadəsinə verilib, multimedia kurslarının təşkili üçün tyutorlara təlim kursları keçirilib və Elektron Tədris Mərkəzində lazımi şərait yaradılıb.