İnfrastruktur

Ana səhifə

İnfrastruktur

Azərbaycanın təkrar avtomobil bazarında orta qiymət dəyişməz qalıb

21 aprel 2009 07:21 (UTC +04:00)

Bakı. Rəşad Süleymanov – APA-Economics. Cari ilin mart ayında Azərbaycanın təkrar avtomobil bazarında təklif üzrə artım 4,9%, tələb artımı isə 1,2% təşkil edib. Bu barədə «APA-Economics»ə «Əmlak Bazarı İştirakçıları» İctimai Birliyindən məlumat verilib.

Ay ərzində satış mərkəzlərinə müraciət edənlərin sayında da ötən ayla müqayisədə artım qeydə alınıb ki, bu da bağlanan əqdlərin dinamikasının artmasına az da olsa, təsir göstərib (2,7%). Ay ərzində bazarda orta qiymət dəyişməz qalıb və 16 240 ABŞ dollarına bərabər olub.

Mart ayında avtomobillərin ekspozisiya müddəti daha 4 gün artaraq 89 günə çatıb. Müvafiq olaraq risk dərəcəsi artıb, əmlakın bu növü üzrə likvidlik dərəcəsi isə aşağı düşüb.

Ay ərzində təkrar avtomobil bazarında araşdırma predmeti olan 6 900-ə qədər avtomobilin cəmi 30%-i bazara məhz mart ayı ərzində təklif olunub. Qalan 70%-i isə əvvəlki aylardan qalan avtomobillərdir.

Bazardakı yerdəyişmələr təkrar bazarda proqnozlaşdırılan qiymət artımının qarşısını alıb və dünyada baş verən maliyyə böhranının avtomobil istehsalçılarına mənfi təsiri martda qiymətlərin bir qədər də ucuzlaşmasına təsir göstərib. Lakin bu proses Azərbaycanın ilkin avtomobil bazarında müşahidə olunmayıb. Bazarın bu seqmenti üzrə də qiymətlər stabil qalıb.

Təkrar bazara təqdim olunan avtomobillərin illər üzrə bölgüsündə ciddi dəyişiklik baş verməyib. Araşdırmalar göstərir ki, tədricən ili köhnə olan avtomobillərə maraq azalır. 1998-1999-cu illərin istehsalı olan avtomobillərin bazarda 1996-1997-ci illərin markalarını üstələmə tendensiyası davam edir. Bununla yanaşı, ili yeni olan avtomobillərə marağın artması təklifdə də ili yeni olan avtomobillərin çoxalması ilə müşahidə olunur. Ekspertlər hesab edirlər ki, yaxın gələcəkdə bazarda üstünlük 2000-ci ildən bu yana istehsal olunmuş avtomobillərə keçəcək.

Qeyd edək ki, monitorinq qrupunun araşdırmaları 1990-2008-ci illərdə istehsal olunan avtomobilləri əhatə edib.