İnfrastruktur

Ana səhifə

İnfrastruktur

Azərbaycan Avstriyanın nəqliyyat sektorunda təcrübəsini öyrənir

19 sentyabr 2011 13:09 (UTC +04:00)

Bakı. Nicat Mustafayev – APA-Economics. Bu gün Bakıda işə başlayan Azərbaycan-Avstriya biznes-forumu çərçivəsində «Nəqliyyatın idarə olunması və nəzarət sistemləri» mövzusunda panel müzakirələri keçirilib.

«APA-Economics»in məlumatına görə, toplantıda Avstriyanın nəqliyyat sahəsində fəaliyyət göstərən 8 şirkətinin nümayəndələri iştirak ediblər. Tədbirdə Azərbaycan Nəqliyyat Nazirliyinin nümayəndələri qonaqlara ölkənin nəqliyyat sahəsindən ətraflı məlumat verib və bildirilib ki, 1993-cü ildən etibarən Azərbaycana nəqliyyat vasitələrinin idxalı kəskin artıb və nəticədə, Bakı şəhərində tıxac problemi yaranıb. Bu problemlərin aradan qaldırılması üçün Nazirlik müvafiq tədbirlərin həyata keçirilməsinə başlayıb. Belə ki, paytaxtda 21 yol ötürücüsü, 11 yeraltı piyada keçidi inşa olunub, eyni zamanda bütün ölkə üzrə mövcud avtomobil yollarının reabilitasiyası, yenidən qurulması, yolların keyfiyyətinin artırılması, yeni yolların salınması istiqamətində işlər görülür. Bundan başqa, ölkədə 4 beynəlxalq hava limanı və 4 beynəlxalq avtovağzal istifadəyə verilib.

Tədbir iştirakçılarına həmçinin Bakı-Tbilisi-Qars dəmir yolu layihəsi, Şimal-Cənub və TRACECA dəhlizləri barədə ətraflı məlumat verilib, onların strateji əhəmiyyəti vurğulanıb.
Müzakirələr zamanı qeyd olunub ki, Azərbaycanda nəqliyyat sektoru ən vacib sahələrdən sayılır və hazırda ölkədə bu sektorun inkişafı və beynəlxalq inteqrasiyasına dair prioritet istiqamətlər müəyyənləşdirilib. Belə ki, nəqliyyat infrastrukturunun yenidən qurulmasında, təhlükəsizliyin təmin olunmasında və dəhlizlərin tikilməsində müasir texnologiyalardan istifadə olunur.

Öz növbəsində Avstriya tərəfi «İctimai nəqliyyatın dünya kapitalı: Vyanada nəqliyyatın idarə olunması və «Smart» nəqliyyat sistemləri» mövzusunda təqdimatla çıxış edib.

Daha sonra tərəflər arasında sözügedən sahə üzrə geniş müzakirələr aparılıb, ikitərəfli əlaqələrin perspektivləri barədə fikir mübadiləsi aparılıb.