Bakı. Şəhriyar Əlizadə -APA. Bakı Apellyasiya Məhkəməsində şair Saday Şəkərli barəsində olan hökmdən verilən apellyasiya şikayəti üzrə məhkəmənin bu günə təyin olunan ilkin baxış iclası təxirə salınıb.
Bu barədə APA-ya məlumat verən vəkil Bəhruz Bayramov bildirib ki, S. Şəkərli Penitensiar Xidmətin Müalicə Müəssisəsinə köçürüldüyü üçün iclasda gətirilməyib. Buna görə proses iyulun 5-nə təxirə salınıb.
Bakı Ağır Cinayətlər Məhkəməsinin hökmü ilə S. Şəkərli 10 il müddətinə azadlıqdan məhrum edilib.
O, Cinayət Məcəlləsinin 182.3.2-ci (külli miqdarda əmlakı hədə-qorxu ilə tələb etmə) maddəsi ilə ittiham olunub.
S. Şəkərli Azərbaycan Yazıçılar Birliyinin üzvüdür.