Kriptovalyuta

Kriptovalyuta

"Bitcoin"in qiyməti 122 min dollara yaxınlaşıb - Yeni tarixi rekord

14 iyul 2025 09:40 (UTC +04:00)

İyul ayının 14-də kriptovalyuta birjalarında "Bitcoin" tarixi rekordunu yeniləyib.

"APA-Economics" xəbər verir ki, dünyanın ən bahalı kriptovalyutası birjalarda 121 977 dollara qədər yüksəlib, “CoinMarketCap” platformasında isə son sutkada 3,25% bahalaşaraq 121 681 ABŞ dolları təşkil edib.

Son bir gündə "Ethereum"un qiymətində paralel artım müşahidə edilib. Sözügedən kriptovalyutanın dəyəri 2,96% artaraq 3044 ABŞ dollarına bərabər olub. İlk üçlükdə olan XRP son sutkada 5,78% bahalaşıb.

Qeyd edək ki, "Bitcoin"in ən yüksək qiyməti bu iyul ayının 11-dən etibarən yenidən yüksək artım dinamikası göstərməyə başlayıb. Analitiklər hesab edirlər ki, yüksək artım dinamikasına səbəb ABŞ və Asiyada spot ETF-lərə (bir neçə aktivin -səhmlər, istiqrazlar, kriptovalyutalar və s. toplandığı “səbət”) artan institusional maraq, ABŞ-da kriptovalyutalara dəstək verən qanunverici təşəbbüslər, inflyasiyanın nəzarətdə saxlanılması fonunda riskli aktivlərə yönələn sərmayələr və qısa mövqelərin bağlanması nəticəsində yaranan texniki alışlardır. Bu amillər birgə şəkildə bazarda güclü yüksəliş dalğası yaradıb.