Maliyyə

Ana səhifə

Maliyyə

“Bank Standard” 28 mln. ABŞ dolları həcmində sindikatlaşdırılmış kredit cəlb edib

24 iyul 2008 15:40 (UTC +04:00)

Bakı. Nicat Mustafayev – APA-Economics. Azərbaycanın «Bank Standard» Səhmdar Kommersiya Bankı 28 mln. ABŞ dolları həcmində sindikatlaşdırılmış kredit cəlb edib.
«Bank Standard»dan «APA-Economics»ə verilən məlumata görə, buna dair ABŞ «Citibank»ının London ofisi və Cənubi Afrikanın «Standard Bank» təşkilatları ilə «Bank Standard» arasında müqavilə imzalanıb. Başlanğıcda adı çəkilən təşkilatçı banklar tərəfindən 20 mln. dollar həcmində kredit xəttinin açılması planlaşdırılsa da, kreditin məbləğinə yenidən baxılıb və onun həcmi 40% artırılaraq 28 mln. dollara çatdırılıb. Sözügedən kredit Azərbaycan bankı üçün xarici supranasional maliyyə institutunun iştirakı olmadan ayrılan ilk 2 illik maliyyə tranşıdır. Kredit iki hissədən ibarətdir. 12 ay müddətinə təqdim olunan 17,5 mln. dollar həcmindəki ilk tranş üçün LİBOR+3%, 2 il müddətinə nəzərdə tutulan 10,5 mln. dollar həcmindəki ikinci tranş üçün isə LİBOR+ 4% dərəcəsi tətbiq olunacaq. Kredit korporativ müştərilərə, o cümlədən, ticarət əməliyyatlarının maliyyələşdirilməsinə yönəldiləcək.
Qeyd edək ki, bu ilin iyun ayının sonuna «Bank Standard»ın aktivlərinin ümumi həcmi 690,9 mln. manat, ayrılan kreditlərin həcmi 439,1 mln. manat, müştəri hesablarında olan vəsaitlərin həcmi isə 259,8 mln. manat təşkil edib.

“Bank Standard”