Maliyyə

Ana səhifə

Maliyyə

«Turanbank» bu il aktivlərini 56% artırmaq niyyətindədir

24 sentyabr 2008 12:02 (UTC +04:00)

Bakı. Elnur Hüseynquluyev – APA-Economics. Azərbaycanın «Turanbank» Səhmdar Kommersiya Bankı (SKB) 2008-ci il ərzində aktivlərinin həcmini 56% artıraraq 98,5 mln. manata çatdırmaq niyyətindədir.
Bankın strateji planlama və beynəlxalq əlaqələr şöbəsinin müdiri Rəşad Tanrıverdiyevin «APA-Economics»ə verdiyi məlumata görə, eyni zamanda bankın kredit, depozit və nizamnamə kapitalında da artım gözlənilir. Belə ki, növbəti ilin yanvar ayının 1-nə bankın kredit portfeli 52% artaraq 74,3 mln. manata, depozit portfeli 2,3 dəfə artaraq 42,3 mln. manata çatacaq. Həmçinin, nizamnamə kapitalı 44% artaraq 18 mln. manat həddinədək çatdırılacaq.
Qeyd edək ki, nizamnamə kapitalının artırılması bankın mövcud səhmdarları hesabına həyata keçiriləcək.
Xatırladaq ki, təsisçisi 17 hüquqi və 37 fiziki şəxs olan «Turanbank» SKB 1992-ci ildən fəaliyyət göstərir. Cari ilin iyul ayının 1-nə bankın aktivlərinin həcmi 76,175 mln. manat, kredit portfeli 57,417 mln. manat, depozit portfeli 33,889 mln. manat, məcmu kapitalı 15,703 mln. manat, o cümlədən nizamnamə kapitalı 14 mln. manat təşkil edib. Bankın respublika üzrə 11 filialı, 9 bankomatı və 64 POS-terminalı fəaliyyət göstərir.