Maliyyə

Ana səhifə

Maliyyə

«United Credit Bank» son bir ildə aktivlərini 46% artırıb

12 dekabr 2008 07:08 (UTC +04:00)

Bakı. Elnur Hüseynquluyev – APA-Economics. Azərbaycanın «United Credit Bank» Səhmdar Kommersiya Bankının (SKB) aktivlərinin həcmi 2008-ci ilin dekabr ayının 1-nə 31,744 mln. manat təşkil edib ki, bu da 2007-ci ilin analoji dövrü ilə müqayisədə 45,5% çoxdur.
Bankın İdarə Heyətinin sədr müavini Vahid Əliyevin «APA-Economics»ə verdiyi məlumata görə, hesabat dövründə bankın kredit portfeli 29,2% artaraq 21,154 mln. manata, o cümlədən istehlak kreditlərinin həcmi 9,3% artaraq 9,096 mln. manata çatıb. Bununla yanaşı, depozit portfeli 39,8% genişlənərək 7,755 mln. manat, məcmu kapital 2,5% artaraq 13,359 mln. manat, o cümlədən nizamnamə kapitalı sabit qalaraq 12,108 mln. manat təşkil edib.
Qeyd edək ki, bu ilin yanvar-noyabr aylarında bankın gəlirləri 4,416 mln. manat, xərcləri isə 4,366 mln. manat olub. Bu isə ötən ilin eyni dövrü ilə ilə müqayisədə müvafiq olaraq 41,9% və 40,3% çoxdur. Nəticədə, bankın mənfəəti 1,8% artaraq 49,86 min manata çatıb.
Təhlil olunan dövr ərzində bankın ümumi vergi ödənişlərinin həcmi 54,1% artaraq 260,7 min manat, PR və marketinq xərcləri isə 2,1 dəfə artaraq 17,398 min manat olub.
Həmçinin, bu dövr ərzində bankın işçilərinin sayı 8,2% artaraq 92 nəfər, orta aylıq əmək haqqı isə 45,8% artaraq 745 manat təşkil edib.
Təsisçisi 1 hüquqi və 2 fiziki yerli şəxs olan «United Credit Bank» 1996-cı ildə «Rossiyskiy Kredit» Rusiya-Azərbaycan Kommersiya Bankı kimi yaradılıb və 1998-ci ildə brendini dəyişib. Hazırda bakın respublika üzrə 5 filialı və 5 bankomatı fəaliyyət göstərir.