Maliyyə

Ana səhifə

Maliyyə

Azərbaycana xaricdən cəlb olunan kapitalın həcmi 9% artıb

15 dekabr 2008 11:43 (UTC +04:00)

Bakı. Vahab Rzayev – APA-Economics. Azərbaycanın 2008-ci ilin yanvar-sentyabr ayları üzrə tədiyyə balansında əks olunan xaricdən cəlb edilən kapitalın ümumi məbləği 5 974,0 mln. dollar təşkil edib ki, bu da ötən ilin müvafiq dövrünün göstəricisindən 8,8% çoxdur. Azərbaycan Milli Bankdan «APA-Economics»ə verilən məlumata əsasən, bu məbləğin yalnız 8%-i birbaşa dövlət təminatı əsasında cəlb olunan kreditlərdir:

(mln. ABŞ dolları)

Cəlb olunan xarici kapitalın strukturu
	Yanvar-sentyabr, 2007-ci il	Yanvar-sentyabr, 2008-ci il
Birbaşa investisiyalar	3 391,9	2 959,4
- neft-qaz sektoru	3 115,0	2 479,7
- digər sektorlar	276,9	479,7
Kreditlər və digər investisiyalar	2 052,4	3 011,1
- dövlət təminatlı kreditlər	313,4	478,0
- dövlət təminatlı olmayan kreditlər	1 164,4	1 991,9
- neft-qaz sektoru	456,4	688,2
- banklar	615,6	967,1
- digərləri	92,6	336,6
- digər investisiyalar	574,4	541,2
Neft bonusu	46,2	3,5
CƏMİ	5 490,5	5 974,0

Birbaşa investisiyalar formasında xaricdən cəlb olunan sərmayələrin ümumi həcmi 3,0 mlrd. dollara yaxın olub. Bu investisiyaların strukturunda neft-qaz sektorunun xüsusi çəkisi 83,8% təşkil edib. Hesabat dövründə qeyri-neft sektoruna 479,7 mln. dollar yönəldilib.
Tədiyyə balansına əsasən, birbaşa investisiyalar üzrə xarici ölkələrin iqtisadiyyatına yönəldilən birbaşa investisiyaların ümumi həcmi 44,4% azalaraq 3,6 mlrd. dollar təşkil edib. Bu azalma əsasən «Əsrin müqaviləsi» çərçivəsində konsorsium (Azərbaycan Beynəlxalq Əməliyyat Şirkəti) tərəfindən birbaşa investisiyalar üzrə kapitalın repatriasiyasının azalması ilə bağlıdır. Belə ki, 2007-ci ilin yanvar-sentyabr aylarında neft-qaz sektoru üzrə repatriasiya olunan investisiyaların həcmi 6,1 mlrd. dollar olduğu halda, 2008-ci ilin eyni dövründə bu göstərici 2,74 mlrd. dollar azalaraq 3,36 mlrd. dollar təşkil edib.