Maliyyə

Ana səhifə

Maliyyə

«Bank of Baku» yeni uduş kampaniyasına başlayıb

15 dekabr 2008 11:45 (UTC +04:00)

Bakı. Elnur Hüseynquluyev – APA-Economics. Azərbaycanın «Bank of Baku» Səhmdar Kommersiya Bankı (SKB) 15 illik yubileyi münasibəti ilə «Nümunəvi Müştəri» adlı yeni uduş kampaniyasına başlayıb.
Bankın baş ofisindən «APA-Economics»ə verilən məlumata görə, kampaniya bankda avtomobil, telefon, mebel, kompüter və məişət texnikası krediti olan müştərilərə, həmçinin «Dinamik plyus» kart sahiblərinə şamil edilir. Bu kampaniya cari ilin dekabr ayının 15-dən 2010-cu ilin yanvar ayının 15-dək davam edəcək. Bu müddət ərzində kampaniyanın 13 uduşu keçiriləcək ki, bu uduşlar da hər ayın ilk həftəsinin son iş günündə təşkil ediləcək.
Kampaniyanın şərtlərinə görə, krediti kampaniyanın bu və ya digər uduşunun keçirildiyi vaxta aktiv olmaqla, minimum bir ödənişi olan və ödəniş qrafiki üzrə gecikməsi olmayan müştərilər iştirakçı qismində cəlb olunurlar. Kampaniya ərzində keçirilən uduşlarda qalib gələn müştərilərə 1000 manat məbləğində pul hədiyyəsi veriləcək.
Xatırladaq ki, «Bank of Baku» SKB 1994-cü ilin fevral ayında «Tuqay Bank» adı ilə fəaliyyətə başlayıb. Bankın təsisçiləri rolunda Türkiyənin «NAB Dış Ticarət» şirkəti və bir neçə fiziki şəxs çıxış edir.
Cari ilin oktyabr ayının 1-nə bankın aktivlərinin həcmi 185,149 mln. manat, kredit portfeli 153,773 mln. manat, depozit portfeli 145,616 mln. manat, məcmu kapitalı 25,521 mln. manat, o cümlədən nizamnamə kapitalı 6,8 mln. manat təşkil edib. Bankın respublika üzrə 15 filialı, 2 şöbəsi, 23 bankomatı və 226 POS-terminalı fəaliyyət göstərir.