Maliyyə

Ana səhifə

Maliyyə

Azərbaycanın sərhəd gömrük məntəqələrində yüklərin rəsmiləşdirilməsinə sərf olunan vaxt minimuma endirilir

17 dekabr 2008 11:53 (UTC +04:00)

“APA-Economics”in məlumatına görə, DGK sədri Aydın Əliyev yeni sistemin gömrük məntəqələrində yüklərin keçidinin daha da asanlaşdıracağını bildirib.
A.Əliyev qeyd edib ki, “bir pəncərə” sisteminin yaradılmasında, Gürcüstan, Moldova, ABŞ, İsveçrə kimi ölkələrin təcrübəsi öyrənilib: “Bu sistemin tətbiqi nəticəsində nəqliyyat vasitələrinin gömrükdən keçidi 20 dəqiqə ərzində mümkün olacaq. Əvvəllər buna 2-3 saat sərf olunurdu. Bütün vergi və rüsumlar bir pəncərədə ödəniləcək və sənədlər bir pəncərədə rəsmiləşdiriləcək” .
A.Əliyev bu sistemin tətbiqinin nəqliyyat dəhlizlərinin daha da sürətli işləməsinə, Azərbaycanda biznes mühitinin yaxşılaşdırılmasına, vaxt itkisinin aradan qaldırılması və məsrəflərin azalmasına imkan verəcəyini vurğulayıb.
“Bu sistem dəmir yolu və hava nəqliyyatında da tətbiq olunacaq. Gələcəkdə təkmilləşmə nəticəsində vaxt itkilərinin daha da azaldılması mümkündür”, - deyə A.Əliyev vurğulayıb.
Sistemin təqdimatını keçirən DGK –nın Gömrük nəzarətinin təşkili Baş İdarəsinin rəisi Şahin Bağırov isə bildirib ki, 2009-cu il yanvar ayının 1-dən vətəndaşlar sərhədi keçərkən sənədləri rəsmiləşdirmək üçün müxtəlif instansiyalara müraciət etməyəcəklər. Eyni zamanda, onların vaxt itkiləri minimuma enəcək, “Hazırda 5 sərhəd keçid məntəqəsində yeni infrastruktur qurulur. Həmin məntəqələrdə bu sistemin tətbiqi üçün müvafiq şərait yaradılacaq”.
Yüklər açıldıqda isə onlara nəzarəti və rəyin verilməsini əvvəlki qaydada müvafiq qurumlar həyata keçirəcək. DGK rəsmi bildirib ki, gələcəkdə yüklərin elektron formada rəsmiləşdirilməsi də aparılacaq.