Maliyyə

Ana səhifə

Maliyyə

«MBASK» həyat sığortası üzrə ixtisaslaşmış şirkət yaratmağa hazırlaşır

18 dekabr 2008 07:19 (UTC +04:00)

Bakı. Elnur Hüseynquluyev – APA-Economics. Azərbaycanın «MBASK» sığorta şirkətinin səhmdarları həyat sığortası üzrə yeni «MBASK Həyat Sığortası» adlı şirkət yaratmaq məqsədi ilə Maliyyə Nazirliyinin Dövlət Sığorta Nəzarəti Şöbəsinə təkliflər təqdim ediblər.
Şirkətin İdarə Heyətinin sədri Cəmil Məlikovun sözlərinə görə, Dövlət Sığorta Nəzarəti Şöbəsi tərəfindən şirkətə bildirilib ki, hazırda ölkədə aktuari üzrə mütəxəssislərə ehtiyac var və bu tələbat Azərbaycan Sığortaçılar Assosiasiyası (ASA) ilə birlikdə təşkil olunan treninqlər vasitəsi ilə ödənilərsə, o zaman ölkədə həyat sığortası üzrə şirkətləri qeydə almaq olar.
C.Məlikovun sözlərinə görə, həyat sığortası üzrə fəaliyyət göstərən şirkətlərdə aktuarilər ən vacib rol oynayan şəxslərdir: «Bu cür şirkətlərdə sığorta haqları və ödənişlər üzrə riyazi hesablamalara birbaşa aktuarilər cavabdehdir. Hazırda isə Azərbaycanda aktuarilər demək olar ki, yoxdur».
C.Məlikov bildirib ki, beynəlxalq təcrübədə adambaşına düşən sığorta daxilolmaları 100 dolları üstələdiyi halda, bu sığorta növü tətbiq edilə bilər. «Lakin bəzi ölkələrdə (Vyetnam və s.) bu normativ məbləğin aşağı olmasına baxmayaraq, həyat sığortası şirkətləri həmin ölkələrdə fəaliyyət göstərir. Ümid edirəm ki, növbəti il ərzində aktuari çatışmazlığı məsələsi həll olunduqdan sonra bu proses Azərbaycanda daha da sürətlənəcək», - deyə C.Məlikov bildirib.
Qeyd edək ki, «MBASK» sığorta şirkəti 1992-ci ildən fəaliyyət göstərir. Şirkətin təsisçiləri rolunda Avropa Yenidənqurma və İnkişaf Bankı (30%) və fiziki şəxslər çıxış edir. Cari ilin yanvar-sentyabr aylarında şirkətin topladığı sığorta haqlarının həcmi 15,4 mln. manat, ödənişləri isə 4,5 mln. manat olub. Cari ilin oktyabr ayının 1-nə şirkətin nizamnamə kapitalı nizamnamə kapitalı 2 mln. manat təşkil edib.
Şirkətin sığorta portfelinin 80%-i fərdi müştərilər, 20%-i isə korporativ müştərilərin payına düşür. Hazırda şirkətin rəsmi işçilərinin sayı 160 nəfər, sığorta agentlərinin sayı 300 nəfərdən çoxdur. «MBASK» işçilərin sayına görə respublika üzrə «Azərsığorta» Dövlət Sığorta Kommersiya Şirkətindən sonra ikinci yeri tutur. Şirkət 29 sığorta növü üzrə xidmət göstərir.