Maliyyə

Ana səhifə

Maliyyə

«Bank Respublika» ilin əvvəlindən aktivlərini 53% artırıb

18 dekabr 2008 08:33 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Respublika» Səhmdar Kommersiya Bankının (SKB) aktivlərinin həcmi 2008-ci ilin dekabr ayının 1-nə 386,4 mln. manat təşkil edib ki, bu da ilin əvvəlinə olan göstərici ilə müqayisədə 52,6% çoxdur.
Bankın baş ofisindən «APA-Economics»ə verilən məlumata görə, hesabat dövründə bankın kredit portfeli 65,9% artaraq 264,4 mln. manata, depozit portfeli isə 26,4% genişlənərək 140,9 mln. manata çatıb.
Bu müddət ərzində əhalinin əmanətlərinin həcmi 16,9% artaraq dekabrın 1-nə 61,2 mln. manat, əhalinin cari hesablarındakı vəsaitlərinin həcmi isə 16,6 mln. manat təşkil edib. Həmçinin, bankın hüquqi şəxslərin depozitləri 63 mln. manata çatıb ki, bunun 32,2 mln. manatı müddətli depozitlər, 30,8 mln. manatı isə cari hesablardakı vəsaitlərin payına düşüb. Bankın məcmu kapitalı 83,1% artaraq 43,3 mln. manat, o cümlədən nizamnamə kapitalı 79,5% artaraq 22,6 mln. manat olub.
Qeyd edək ki, cari ilin yanvar-noyabr aylarında bankın gəlirləri 55 mln. manat, xərcləri isə 41,7 mln. manat təşkil edib. Nəticədə, bu dövr ərzində bankın balans mənfəəti 13,3 mln. manat olub.
«Bank Respublika» SKB 1992-ci ildən fəaliyyət göstərir. Almaniyanın DEG İnvestisiya Korporasiyası və «Sparkassen International Development Trust» şirkəti 2005-ci ilin aprelindən bankın kapitalında «25%+1 səhm» iştirak paketinə sahibdir.