Maliyyə

Ana səhifə

Maliyyə

«Azərdəmiryolbank» Avropa Yenidənqurma və İnkişaf Bankının kredit xəttinin istifadəsini başa çatdırıb

23 dekabr 2008 08:40 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankı (SKB) Avropa Yenidənqurma və İnkişaf Bankının (EBRD) revolver fondundan 3,35 mln. ABŞ dolları məbləğində qısamüddətli maliyyələşdirmə aparıb. Bankın baş ofisindən «APA-Economics»ə verilən məlumata görə, bununla da EBRD-nin kredit xətti (ötən il 16 mln. dollara qədər artırılıb) demək olar ki, tam istifadə olunub.
«Azərdəmiryolbank» tərəfindən dəstəklənən 2 mln. dollar və 1,35 mln. dollar dəyərindəki yeni layihələr Asiya və Avropadan ticarət və sənaye avadanlığının alınmasını nəzərdə tutur.
Bankın İdarə Heyətinin sədr müavini Yusif Cabbarovun sözlərinə görə, bank gələcəkdə də xarici ticarət əməliyyatlarının maliyyələşdirilməsi ilə bağlı iş adamlarına lazımi köməyi göstərmək niyyətindədir. Qeyd edək ki, «Azərdəmiryolbank»ın EBRD ilə əməkdaşlığının əsası 1999-cu ildə qoyulub. Müxtəlif proqramlar çərçivəsində indiyədək tərəflər arasında xırda, kiçik və orta sahibkarlığın kreditləşdirilməsini nəzərdə tutan ümumi həcmi 42,5 mln. dollar olan sazişlər bağlanıb.
Xatırladaq ki, «Azərdəmiryolbank» SKB 1989-cu ildə təsis edilib. Bankın 850-yə yaxın səhmdarı mövcuddur, səhmlərin «25%+1 səhm» zərfi Avropa Yenidənqurma və İnkişaf Bankına, 10%-i Hollandiyanın Maliyyə İnkişaf Təşkilatına (FMO), 10%-i hüquqi şəxslərə, qalanı isə fiziki şəxslərə məxsusdur. Cari ilin oktyabr ayının 1-nə bankın aktivlərinin həcmi 226,6 mln. manat, kredit portfeli 171,7 mln. manat, depozit portfeli 63,91 mln. manat, məcmu kapitalı 34,13 mln. manat, o cümlədən nizamnamə kapitalı 13,4 mln. manat təşkil edib.