Maliyyə

Ana səhifə

Maliyyə

Azərbaycanda fiziki şəxslərin gəlir vergisi üzrə proqnoz ötən il 20% kəsirlə icra olunub

21 yanvar 2009 13:40 (UTC +04:00)

Bakı. Rəşad Süleymanov – APA-Economics. Azərbaycan Vergilər Nazirliyi tərəfindən 2008-ci ildə dövlət büdcəsinə köçürülən vəsaitin məbləği 5 746 565,8 min manat və ya müvafiq illik proqnozdan 6,4% çox olub. Bu barədə «APA-Economics»ə Vergilər Nazirliyindən məlumat verilib.
Ötən il Vergilər Nazirliyi tərəfindən dövlət büdcəsinə ödənilmiş vəsaitin həcmi 2007-ci il ilə müqayisədə 26,3%, 2006-cı ilə nisbətən isə 2,1 dəfə artıb.
Hesabat dövründə əlavə dəyər vergisi üzrə büdcəyə 1 169 893,6 min manat (proqnozdan 2,4% çox), aksizlər üzrə 395 810,5 min manat (+8,4%), mənfəət vergisi üzrə 2 863 950,2 min manat (+16,9), mədən vergisi üzrə 147 749,5 min manat (+7,8%), torpaq vergisi üzrə 30 789,7 min manat (+2,1%), əmlak vergisi üzrə 113 225,5 min manat (+2,8%), dövlət rüsumu üzrə 59 870,7 min manat (+13,4%), yol vergisi üzrə 27 365,6 min manat (+4,1%), sadələşdirilmiş vergi üzrə 65 654,5 min manat (+3,2%), sair daxilolmalar üzrə isə 234 455,8 min manat (+5,5%) olmaqla proqnozda nəzərdə tutulandan çox vəsait ödənilib.
Bununla yanaşı, ötən il fiziki şəxslərin gəlir vergisi üzrə daxilolmalar 20,2% kəsirlə yerinə yetirilməklə büdcəyə 637 800,2 min manat, dövlət mülkiyyətində olan torpaqların icarəyə verilməsindən icarə haqları üzrə daxilolmalar isə 56,9% kəsirlə icra olunmaqla 1 724,9 min manat vəsait ödənilib.
Qeyd edək ki, 2008-ci ilin dövlət büdcəsində Vergilər Nazirliyi üçün proqnoz tapşırığı 5,399 mlrd. manat həcmində müəyyənləşdirilib.