Maliyyə

Ana səhifə

Maliyyə

Azərbaycanda əhalinin nominal pul gəlirləri ötən il 38%, real pul gəlirləri isə 17% artıb

22 yanvar 2009 13:28 (UTC +04:00)

Bakı. Vahab Rzayev – APA-Economics. Azərbaycanda əhalinin nominal pul gəlirlərinin artım tempi 2008-ci ildə 37,8% təşkil edib. «APA-Economics»in Dövlət Statistika Komitəsinə istinadən verdiyi məlumata əsasən, hesabat ilində ölkədə inflyasiyanın səviyyəsi 20,8% təşkil etdiyinə görə, əhalinin real pul gəlirlərinin ötən ilki artım tempi 17%-ə bərabər olub. Bu korrektə pul gəlirlərinin inflyasiya tərəfindən «yeyilən» hissəsinin müəyyənləşdirilməsi üçün zəruridir.
Beləliklə, əhalinin nominal pul gəlirlərinin həcmi 20,1 mlrd. manat təşkil etdiyi halda, onun 4,2 mlrd. manatı qiymətlərin artımı nəticəsində «silinməlidir». Buna baxmayaraq, sıfır dərəcəli inflyasiya şəraitində Azərbaycanın əhalisi tərəfindən əldə edilən gəlirlər 15,9 mlrd. manat təşkil edir ki, bu da əvvəlki illə müqayisədə 17% çoxdur.
Eyni zamanda qeyd olunmalıdır ki, əhalinin istehlak mallarının alınması və xidmətlərin ödənilməsinə yönəldilən xərclərinin həcmi 2008-ci ildə 14,3 mlrd. manat təşkil edib ki, bunun da təxminən 3 mlrd. manatı qiymət artımı nəticəsində yaranan artımdır.
Beləliklə, əhalinin xərclərində əsas yerə malik olan bu məsrəflər ödənildikdən sonra əhalinin sərəncamında 5,8 mlrd. manat qalıbsa, sıfır dərəcəli inflyasiya şəraitində bu həcm 4,6 mlrd. manata bərabər olardı. Pul gəlirlərinin artım tempi inflyasiyanın səviyyəsini 1,8 dəfə üstələdiyinə görə, 2008-ci ildə real pul gəlirləri şərti sıfır dərəcəli inflyasiya şəraitində yarana bilən gəlirlərin həcmindən daha yüksək olub.