Maliyyə

Ana səhifə

Maliyyə

Azərbaycan dünya maliyyə böhranının Dövlət Sosial Müdafiə Fondunun daxilolmalarına təsirini azaltmaq məqsədi ilə tədbirlər görəcək

22 yanvar 2009 14:06 (UTC +04:00)

Bakı. İlhamə İsabalayeva - APA. Dünyada maliyyə böhranı bu il Azərbaycanda pensiyaların maliyyələşdirilməsində heç bir problem yaratmayacaq. Əmək pensiyalarının ödənişində ciddi ləngimələrin olacağı da gözlənilmir. Bunu APA-ya Dövlət Sosial Müdafiə Fondunun (DSMF) ictimaiyyətlə əlaqələr sektorunun müdiri Elman Babayev bildirib.
E.Babayevin sözlərinə görə, 2009-cu il büdcə tərtib olunarkən bütün bu məsələlər nəzərə alınıb. Bu il fondun xərclərinin 93,5%-i və ya 1,66 mlrd. manatı əmək pensiyalarının ödənilməsinə sərf ediləcək. Həmin vəsaitin 1,21 mlrd. manatı əmək pensiyalarının baza hissəsinə, 450 mln. manatı isə əmək pensiyalarının sığorta hissəsinə yönəldiləcək.
E.Babayev əlavə edib ki, 2009-cu ildə məcburi dövlət sosial sığorta haqlarının yığımına xüsusi diqqət yetiriləcək. Ümumi məbləği 1,278 mlrd. manat təşkil edəcək məcburi dövlət sosial sığorta haqlarının 542,7 mln. manatı büdcədən maliyyələşən təşkilatlardan, 735,3 mln. manatı digər sığorta edənlərdən daxil olacaq. E.Babayevin sözlərinə görə, büdcədən maliyyələşən təşkilatlardan məcburi dövlət sosial sığorta haqlarının ödənilməsində ciddi problemin olacağı gözlənilmir.
Amma bununla belə, dünya maliyyə böhranının qeyri-büdcə sektorundan fonda ödənilən sosial sığorta vəsaitlərinin həcminə təsiri gözlənilir. Bu mümkün təsirin qarşısının alınması üçün tədbirlər görüləcək. «Aparılan ilkin hesablamalar zamanı qeyri-büdcə təşkilatlarında əmək haqlarının 35% artırılmasını düşünürdük və buna əsasən də məcburi dövlət sosial sığorta haqlarının növbəti ildə qeyri-büdcə sektorunda belə yüksək artımını nəzərdə tuturduq. Ancaq bu gün qlobal iqtisadiyyatda baş verən hadisələr bunun belə olacağını şübhə altına alır. Belə bir şəraitdə əsasən çalışanların əmək haqlarının leqallaşdırılmasına, yaxud qeydiyyatda olmayan işləyənlərin qeydiyyata alınmasına daha çox diqqət yönəldiləcək. Bununla bağlı Vergilər Nazirliyi, Əmək və Əhalinin Sosial Müdafiəsi Nazirliyinin Dövlət Əmək Müfəttişliyi ilə koordinasiya olunmuş fəaliyyət həyata keçiriləcək. Müvafiq icra hakimiyyəti orqanları ilə birgə bu sahədə mövcud problemlərin aradan qaldırılması məqsədilə tədbirlər planı hazırlanır. Bu tədbirlər özündə qanunvericiliyin təkmilləşdirilməsini və səmərəli inzibati nizamlama mexanizmlərinin tətbiqini nəzərdə tutacaq», - DSMF rəsmisi vurğulayıb.
E.Babayev qeyd edib ki, bu il əmək haqlarının leqallaşdırılması və işçilərlə əmək münasibətlərinin rəsmiləşdirilməsi istiqamətində müvafiq icra hakimiyyəti orqanlarının birgə fəaliyyətinin öz müsbət nəticəsini verəcəyi gözlənilir. Bu isə öz növbəsində özəl sektor tərəfindən ödənilən məcburi dövlət sosial sığorta haqları üzrə daxilolmaları artıracaq. DSMF təmsilçisinin bildirdiyinə görə, bu il sosial sığorta haqları üzrə cari öhdəliklərin yerinə yetirilməsi, eləcə də əvvəlki dövrlərdə yaranmış borcların ödənilməsi, sosial sığortadan yayınma hallarının qarşısının alınması istiqamətində tədbirlərin görülməsi daha da intensivləşdiriləcək.