Maliyyə

Ana səhifə

Maliyyə

«KredoBank» ötən il aktivlərini 42% artırıb

23 yanvar 2009 14:30 (UTC +04:00)

Bakı. Elnur Hüseynquluyev – APA-Economics. Azərbaycanın «KredoBank» Səhmdar Kommersiya Bankının (SKB) aktivlərinin həcmi 2009-cu ilin yanvar ayının 1-nə 37,074 mln. manat təşkil edib ki, bu da ötən ilin əvvəlinə olan analoji göstəricidən 42,4% çoxdur.
Bankın baş ofisindən «APA-Economics»ə verilən məlumata görə, hesabat dövründə «KredoBank»ın depozit portfeli 2,1 dəfə genişlənərək 9,071 mln. manata, kredit portfeli 46,8% artaraq 25,302 mln. manata, o cümlədən istehlak kreditlərinin həcmi 2,7 dəfə artaraq 5,804 mln. manata çatıb. Bankın məcmu kapitalı 4,5% artaraq 13,776 mln. manat, o cümlədən nizamnamə kapitalı 3,2% artaraq 13,040 mln. manat təşkil edib.
Qeyd edək ki, ötən il ərzində bankın gəlirləri 65,3% artaraq 6,776 mln. manata, xərcləri isə 75% artaraq 6,634 mln. manata çatıb. Nəticədə, bankın mənfəəti 47,5% azalaraq 201 min manat, xalis mənfəəti isə 54,3% azalaraq 142 min manat təşkil edib. Həmçinin, 2008-ci ildə bankın ümumi vergi ödənişlərinin həcmi 17,3% azalaraq 59,53 min manat olub.
Bundan başqa, bank bu müddət ərzində əlavə 1 filial açıb, 4 bankomat və 55 POS-terminal quraşdırıb. İşçilərin sayı 22% artaraq 133 nəfərə, orta aylıq əmək haqqı isə 3,6 dəfə artaraq 210 manata çatıb.
Təsisçisi 11 yerli fiziki şəxs olan «KredoBank» 1994-cü ildə yaradılıb. Hazırda bankın respublika üzrə 10 filialı, 16 mübadilə məntəqəsi, 5 bankomatı və 55 POS-terminalı fəaliyyət göstərir.