Maliyyə

Ana səhifə

Maliyyə

Azərbaycan ötən il ixracı 7 dəfə artırıb

26 yanvar 2009 09:10 (UTC +04:00)

Bakı. Rəşad Süleymanov – APA-Economics. Ötən il Azərbaycanın uzaq xarici ölkələrlə ticarət dövriyyəsində 41 313 481,1 min ABŞ dolları həcmində müsbət, MDB ölkələri ilə isə 720 719,7 min dollarlıq mənfi saldo yaranıb. Bu barədə «APA-Economics»ə Dövlət Gömrük Komitəsindən məlumat verilib.
Hesabat dövründə Azərbaycandan uzaq xarici ölkələrə 46 136 610,2 min dollar, MDB ölkələrinə isə 1 619 619,2 min dollar dəyərində mal ixrac, uzaq xarici ölkələrdən 47 823 129,1 min dollar, MDB ölkələrindən isə 2 340 338,9 min dollar dəyərində mal isə idxal olunub.
Uzaq xaricə və MDB ölkələrinə ixracın əsas hissəsini mineral yanacaq, neft və neft emalı məhsulları təşkil edib. Hesabat dövründə uzaq xarici ölkələrdən idxalda əsas yeri avadanlıqlar, mexaniki qurğular, nəqliyyat vasitələri, MDB ölkələrindən isə dənli bitkilər, quru nəqliyyatı vasitələri və s. tutub.
Ötən il Azərbaycanın xarici ticarət dövriyyəsi 47 756 229,4 min dolları ixrac, 7 163 467,9 min dolları idxal olmaqla 54 919 697,3 min dollar təşkil edib. İxrac əməliyyatlarının həcmi 2007-ci illə müqayisədə təxminən 7 dəfə, idxal əməliyyatlarının həcmi isə 25,38% artıb.
Qeyd edək ki, 2008-ci ildə xarici ticarətlə 13 265 hüquqi və fiziki şəxs məşğul olub. İxrac əməliyyatlarında dövlət sektorunun payı 37,81%, özəl sektorun payı 61,78%, fiziki şəxslərin payı isə 0,41% olub. İdxal əməliyyatlarında isə bu, müvafiq olaraq 24,73%, 70,14% və 5,13% təşkil edib.