Maliyyə

Ana səhifə

Maliyyə

Qızıl xeyli bahalaşacaq

26 yanvar 2009 09:33 (UTC +04:00)

«APA-Economics»in məlumatına görə, ötən həftə Nyu-Yorkun NYMEX əmtəə birjasında qızılın qiyməti 7% artıb, o cümlədən yanvarın 23-də qızılın 1 unsiyası 37 dollar və ya 4,3% bahalaşaraq 895,8 dollara çatıb. Eyni zamanda, Azərbaycan Milli Bankı yanvarın 26-da qızılın rəsmi məzənnəsini 705,2 manat (875,8 dollar) səviyyəsində müəyyənləşdirib ki, bu da həftə ərzində 5,3% artım deməkdir.
Qızılın dünya bazarında kəskin bahalaşması qiymətli kağızlar, dollar və avroya etimadı azalan investorların daha təhlükəsiz və gəlirli aktivlər əldə etmək istəyi ilə bağlıdır. Son vaxtlar dünya bazarında valyuta məzənnələrinin qeyri-sabitliyi və proqnozlaşdırmanın çətinləşməsi investorları qızıla üstünlük verməsi ilə nəticələnib.
Qeyd edək ki, yanvarın ortalarında dünyanın ən iri maliyyə idarəetməsi və konsaltinq şirkətlərindən biri olan «Merrill Lynch»in 2009-cu ildə qızılın tədricən bahalaşması və mart ayında 1 030 dollar, iyunda isə 1 150 dollara çatması ilə bağlı proqnozu hələ özünü doğruldur. Eyni zamanda, aparıcı ölkələrdə iqtisadi böhrana qarşı görülən tədbirlər nəticəsində maliyyə bazarlarında yarana biləcək qeyri-müəyyənlik qızılın bahalaşması prosesini daha sürətləndirə bilər.
Hazırda investorların bir hissəsi öz vəsaitlərini fond bazarlarından çıxararaq dollara yönəldir ki, bu da dolların qısamüddətli möhkəmlənməsinə səbəb olur. Lakin ABŞ-ın yeni rəhbərliyinin iqtisadi böhranla mübarizə çərçivəsində hazırladığı tədbirlər planının həyata keçirilməsi bəzi səbəblərə görə dolların ucuzlaşmasına gətirib-çıxara bilər. Bu təqdirdə hazırda dollara sərmayə yatıran investorlar da qızıl bazarına çıxa bilər ki, bu da onun qiymətini daha da yüksəldəcək.