Maliyyə

Ana səhifə

Maliyyə

Azərbaycan Dövlət Neft Fondunun 2009-cu büdcəsi də 70 dollardan hesablanıb

28 yanvar 2009 15:07 (UTC +04:00)

Bakı. Vahab Rzayev – APA-Economics. Azərbaycan Respublikası Dövlət Neft Fondunun (ARDNF) 2009-cu il büdcəsi artıq qurumun Müşahidə Şurasına təqdim olunub. «APA-Economics»in məlumatına əsasən, bunu bildirən ARDNF-in icraçı direktoru Şahmar Mövsumov qeyd edib ki, büdcənin yaxın günlərdə təsdiqlənməsi gözlənilir.
Ş.Mövsumovun sözlərinə görə, Fondun builki büdcəsinin gəlirləri 14 mlrd. manatdan çoxdur, xərcləri isə 5,7 mlrd. manat təşkil edir. Məlumat üçün bildirək ki, ARDNF-in büdcəsi dövlət büdcəsi kimi neft baza qiyməti 70 dollar/barel olmaq şərti ilə tərtib olunub. Hazırda dünya bazarında neftin qiyməti isə 40-45 dollar təşkil edir və bu, hər iki büdcənin icrasını sual altına qoyur.
Məsələni şərh edən Ş.Mövsumov qeyd edib ki, hazırkı mərhələdə, yəni ilin əvvəlində büdcənin hər hansı dəyişikliyi, sekvestri və s. məsələləri müzakirə etmək düzgün olmazdı, lakin bunun vacibliyi və zərurəti il ərzində yarana bilər. Eyni zamanda, Ş.Mövsumov bildirib ki, neftin 1 barelinin qiyməti 50 dollar təşkil etdiyi halda, ARDNF-in gəlirləri cari ildə 9-10 mlrd. manata bərabər olacaq: «Bizim əsas məqsədimiz cari ildə Neft Fondunun vəsaitlərin azalmamasıdır».
ARDNF-dən dövlət büdcəsinə transferlərin artırılmasının mümkünlüyünü şərh edərək isə Ş.Mövsumov vurğulayıb ki, əgər neftin qiyməti aşağı səviyyədə qalarsa və bu, dövlət büdcəsi üçün artıq davamlı xarakter daşıyan problemlər yaradarsa, büdcənin sekvestri və ya transferlərin artırması variantlarının seçilməsi məsələsinə baxıla bilər.