Maliyyə

Ana səhifə

Maliyyə

Azərbaycanda məcmu bank mənfəəti ötən il 43% artıb

29 yanvar 2009 13:44 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən bank təşkilatlarının 2008-ci ildə əldə etdiyi məcmu mənfəət 246,03 mln. manat təşkil edib ki, bu da 2007-ci ilin analoji göstəricisindən 42,9% çoxdur.
Azərbaycan Milli Bankından «APA-Economics»ə verilən məlumata əsasən, mənfəətin strukturunda faiz gəlirləri 975,2 mln. manat (illik artım – 78,2%), faiz xərcləri 442,5 mln. manat (artım – 86,3%), qeyri-faiz gəlirləri 283,9 mln. manat (artım – 35,8%), qeyri-faiz xərcləri isə 357,8 mln. manat (artım – 50,4%) təşkil edib.
Qeyd edək ki, ötən il bankların aktivləri üzrə xüsusi ehtiyatlara ayırmalarının həcmi 212,2 mln. manata bərabər olub və bu, 2007-ci ilin analoji göstəricisini 2,2 dəfə üstələyir. Ayırmaların artımı ilk növbədə bank aktivlərinin artımasının nəticəsidir. Belə ki, ötən il ərzində bank aktivlərinin artım tempi 52,8% təşkil edib.
Azərbaycan banklarının maliyyə nəticələri ilk növbədə onu göstərir ki, bankların qeyri-faiz əməliyyatları üzrə zərər əldə olunub. Bu da öz növbəsində həm qeyri-faiz gəlirlərinin az olması, həm də qeyri-faiz xərclərinin çox olması ilə bağlıdır. Qeyd edək ki, qeyri-faiz xərclərinə əmək haqları, inzibati və əsas vəsaitlərlə bağlı məsrəflər aiddir və bunlar bankın ümumi fəaliyyətinin təşkilinə xidmət edir. Lakin qeyri-faiz xərclərinin yalnız qeyri-faiz gəlirləri hesabına ödənilməsi banklardan icbari şərt kimi tələb olunmur. Digər tərəfdən, bankların qeyri-faiz gəlirləri aşağı səviyyədədir. Bunların tərkibində əsas yeri valyuta əməliyyatlarından əldə olunan xalis gəlirlər tutur (106,2 mln. manat). Əlavə olaraq, hesabların aparılması üzrə xidmətlərdən komisyon haqq 94,2 mln. manat, digər xidmət növlərindən komisyon gəlirlər 69,9 mln. manat təşkil edib ki, kreditləşmə və sərmayələrlə bağlı olmayan bank xidmətlərinin çeşidinin geniş olması nəzərə alaraq, bunu mövcud potensialdan daha kiçik gəlir kimi qiymətləndirmək olar.