Maliyyə

Ana səhifə

Maliyyə

Azərbaycan bank sistemi üzrə işçi qüvvəsi səmərəliliyinin şərti əmsalı 8,4 təşkil edir

02 fevral 2009 07:32 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən bankların 2008-ci ildə əldə etdiyi məcmu gəlirlərin strukturunda 871,74 mln. manat müştərilərə verilmiş kreditlər üzrə alınmış faizlərin payına düşür. Azərbaycan Milli Bankından «APA-Economics»ə verilən məlumata əsasən, bankların ötən ilki ümumi gələri 1 259,1 mln. manat təşkil edib və bunun 975,22 mln. manatı faiz, 283,88 mln. manatı isə qeyri-faiz gəlirləridir.
Beləliklə, ümumi gəlirlərin 69,2%-i, faiz gəlirlərinin isə 89,4%-i müştərilərə verilmiş kreditlər üzrə faizlər təşkil edir. Bu fakt ölkənin bank sistemində, gəlir gətirən aktiv əməliyyatlarında və bankların fəaliyyətində kreditlərin mühüm yer tutduğunu göstərir.
Eyni zamanda, ötən il banklar tərəfindən çəkilmiş xərclərin əsas hissəsi, yəni 229,58 mln. manat müddətli depozitlər üzrə ödənilən faizlərin payına düşür. Qeyd edək ki, bankların 2008-ci ildə ümumi xərcləri 800,28 mln. manata bərabər olub ki, bunun 442,48 mln. manatı faiz, 357,80 mln. manatı isə qeyri-faiz xərcləridir. Beləliklə, ümumi xərclərin 28,7%-i, faiz xərclərinin isə 51,9%-i müddətli depozitlər üzrə ödənilən faizlərin payına düşüb. Yəni, bankların əsas məsrəfləri müddətli öhdəliklər üzrə çəkilən xərclərdir ki, bu da bank fəaliyyətində normal haldır. Eyni zamanda, bank xərclərinin strukturunda həcm baxımından 150 mln. manatla ikinci yeri tutan əmək haqqı məsrəfləri çox böyük rəqəmdir. Nəticədə, işçi qüvvəsi səmərəliliyinin şərti əmsalı Azərbaycan bankları üzrə 8,4 təşkil edir. Yəni, sırf işçi qüvvəsini maliyyələşdirmək üçün xərclənən 1 manat 8,4 manat həcmində gəlir və 1,6 manat mənfəət qazandırıb.