Maliyyə

Ana səhifə

Maliyyə

Ötən il Azərbaycanda 40-a yaxın sosial obyekt özəlləşdirilib

02 fevral 2009 10:35 (UTC +04:00)

Bakı. Rəşad Süleymanov – APA-Economics. Ötən il Azərbaycanda 40-a yaxın səhiyyə, təhsil, idman və mədəniyyət sahələrinə aid obyekt özəlləşdirilib. Ümumilikdə, özəlləşdirilməyə açılmış səhiyyə, təhsil, idman və mədəniyyət sahələrinə aid 401 müəssisə və obyektin 170-i özəlləşdirilib. Bu barədə «APA-Economics»ə Dövlət Əmlakının İdarə Edilməsi üzrə Dövlət Komitəsindən (DƏİEDK) məlumat verilib.
Hesabat dövründə 800-ə yaxın obyektin yerləşdiyi torpaq sahəsi özəlləşdirilib. Dövlət müəssisələrinin çevrilməsi nəticəsində 10 səhmdar cəmiyyəti yaradılıb. Səhmdar cəmiyyətlərinin səhmlərinin özəlləşdirilməsi ilə bağlı 60-a yaxın hərrac keçirilib və bu hərraclarda 125-ə yaxın səhmdar cəmiyyətinin səhmləri özəlləşdirilib.
Hesabat dövrü ərzində 20-ə yaxın səhmdar cəmiyyətinin səhmlərinin investisiya müsabiqəsi vasitəsi ilə özəlləşdirilməsi həyata keçirilib və müsabiqələrin qalibləri müəyyən olunub. Müsabiqə şərtlərinə əsasən, müsabiqələrin qalibləri tərəfindən 20 mln. manata yaxın investisiya qoyuluşlarının həyata keçirilməsi nəzərdə tutulur. Eyni zamanda bu müsabiqələr üzrə dövlət büdcəsinə 8 mln. manata yaxın vəsait ödəniləcək.
İnvestisiya müsabiqəsi vasitəsilə özəlləşdirilmiş müəssisələrə 2008-ci il ərzində müqavilələr üzrə müsabiqə qalibləri tərəfindən 52 mln. manat məbləğində investisiya qoyulub.
Ötən il ərzində investisiya müsabiqəsi vasitəsi ilə özəlləşdirilmiş 14 müəssisə üzrə mülkiyyət hüququ alıcılara keçib.
Qeyd edək ki, Azərbaycan prezidenti 2006-cı il avqustun 23-də «Səhiyyə, təhsil, idman və mədəniyyət sahələrində bir sıra müəssisə və obyektlərin özəlləşdirilməsi haqqında» sərəncam imzalayıb.